Shymkentte nóser jaýynnan aýlalar sýǵa tolyp, jurtty ábigerge saldy. Qatty jel men qardyń salmaǵyn kótermegen aǵashtar qulap, kólikterdi basyp qalǵan, dep habarlaidy "Ult aqparat".
Qalalyq TJD baspasóz qyzmetiniń málimetinshe, 26 aqpannan 27-sine qaraǵan túni qala aýmaǵynda jaýǵan jaýyn-shashynnyń saldarynan birneshe úidiń aýlasyna jańbyr sýy jinalǵan. Órt sóndirý bólimderi men jedel-qutqarý jasaǵynyń qutqarý bólimsheleri Abai, Ál-Farabi, Qarataý aýdandarynda sýdy shyǵarý jumystaryn júrgizgen. Avariialyq-qutqarý jumystary Qaitpas-1, Nurtas, Aqjaiyq, Himfarm, Qazyǵurt, Samal – 3 shaǵyn aýdandarynda júrgizilip, onda jeke quramynda 35 qyzmetker 8 tehnika men 8 motopompa jumyldyrylǵan.
Jeke turǵyn úiler men basqa nysandarda jalpy kólemi 1137 tekshe metr sý shyǵarylǵan. Al, tańǵy saǵat 07:48-de «112» Qutqarý qyzmetine Kúnshyǵys shaǵyn aýdanyndaǵy kópqabatty úidiń aýlasynda jáne Ál-Farabi aýdanyndaǵy Túrkistan kóshesi men D.Qonaev dańǵylynyń qiylysynda aǵashtardyń qulaǵany týraly habarlanǵan. Sol siiaqty Ábdirazaqov kóshesindegi kópqabatty úidiń aýlasynda avtokóliktiń ústine aǵash qulaǵandyǵy týraly aqparat túsken.
«Oqiǵa ornyna jedel qutqarý jasaǵynyń qutqarý bólimshesi, órt sóndirý bóliminiń jeke quramynda 15 adam men 3 tehnika jumyldyryldy. Zardap shekkender joq. Oqiǵa saldary joiylǵan», delingen habarlamada.
