Shymkenttegi sterildeý ortalyǵynyń qyzmetkerlerine tólemaqyny durys tólemegen bas dáriger qyzmetinen bosatyldy. Bul týraly qala ákiminiń birinshi orynbasary Erbol Sadyr málimdedi, habarlaidy "Ult aqparat".
Erbol Sadyrdyń aitýynsha, qaladaǵy meditsina qyzmetkerlerine beriletin ústemeaqyǵa qatysty tekserý jumystary aiaqtalǵan. Aita keteiik, ótken aptada sterildeý ortalyǵynyń mamandary basshylaryna senimsizdik tanytyp, tiesili ústemeaqyny tolyq almaityndaryn aitqan bolatyn. Al, jedel járdem qyzmetkerleri ústemeaqylaryn tolyq kólemde ala almai otyrǵandaryn jetkizgen. Osy jaǵdailarǵa bailanysty qala ákiminiń tapsyrmasymen jumys toby qurylyp, eki mekemede tekserý júrgizilgen.
«Tekserý jumystarynyń qorytyndysy boiynsha sterildeý ortalyǵynyń qyzmetkerlerine tólemaqy men járdemaqylaryn qosymsha tóleý barysynda óreskel zańbuzýshylyqtarǵa jol berilgeni anyqtaldy. Soǵan bailanysty ortalyqtyń bas dárigeri qyzmetinen bosatyldy. Ondaǵy meditsinalyq qyzmetkerlerdiń ailyqtarynyń barlyǵy qaita eseptelip, qosymsha járdemaqylary tólendi», - dedi qala ákiminiń birinshi orynbasary.
Erbol Sadyr, sondai-aq, jedel járdem ortalyǵynda jumystardy uiymdastyrý barysynda túsindirý men jedel járdemdi baǵyttaý barysynda qyzmetkerlerge bir deńgeide qosymsha qarjy tólenbegenin jetkizdi.
«Osy jaǵdaidy eskere otyryp, biz arnaiy tólemderdiń kólemin joǵarylattyq. Júrgizýshilerge 125 myń teńgege deiin, dárigerler men feldsherlerge 250 myń teńgege deiin kóterdik. Kishi meditsinalyq personaldarǵa «Halyq bankiniń» demeýshiligimen 40 myń teńgeden qosymsha qarjy tólep berdik. Iaǵni, jedel járdem qyzmetiniń mamandaryna sanattaryna sáikes qosymsha ústemeaqylary tólenedi. Jedel járdem stantsiiasy basshylyǵyna shara qoldaný máselesi qaralýda», - dedi sheneýnik.
