5 sáýir kúni Shymkentte koronovirýstan qaitys bolǵan Túrkistan oblysy Maqtaral aýdany Atakent aýylynyń 1964 jyly týǵan turǵyny qala shetindegi hristian ziratyna jerlendi. Bul týraly Azattyqqa qalalyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Ábdimanap Túlebaev aitty.
Ábdimanap Túlebaevtyń sózinshe, jerleý rásimine arnaiy mamandardan bólek tórt týysynyń qatysýyna ruqsat etildi. Olarǵa Maqtaral aýdanynan karantinge jabylǵan Shymkent qalasyna kirip-shyǵýyna múmkindik berildi.
- Jerleý rásiminde indetke qatysty barlyq qaýipsizdik sharasy saqtaldy. Mamandar men marqumnyń týystary arnaiy kiimder kidi, qabir dárilendi, - dedi departament basshysy.
Departamenttiń dereginshe, marqum 5 sáýir kúni tún aýǵanda qalalyq juqpaly aýrýlar aýrýhanasynyń jansaqtaý bóliminde qaitys bolǵan. Ol 28 naýryz kúni 31 jastaǵy ulymen birge Máskeý-Shymkent-Almaty baǵyty boiynsha júk kóligimen kele jatqanda qala shetindegi blokbeketten ótpek bolǵan. Tekserý kezinde dene qyzýy kóterilgenin anyqtaǵan dárigerler jedel járdemmen aýrýhanaǵa jetkizgen. Marqum budan buryn qant diabeti, pnevmoniia jáne týberkýlezben aýyrǵan.
Al júk kóligimen Almatyǵa ketken uly qazir sol qaladaǵy aýrýhanada oqshaýlanǵan.
Departament Shymkentte koronovirýsqa shaldyqqan 55 jastaǵy naýqastyń da jaǵdaiy aýyr ekenin, jan saqtaý bóliminde jatqanyn habarlady. Qalada virýs juqtyrǵandar sany 14 adamǵa jetken. Naýqastarmen qarym-qatynasta bolǵan myńǵa jýyq adam oqshaýlanyp, dárigerlerdiń baqylaýyna alynǵan.
4 sáýir kúni túnde Shymkentte karantin jariialanǵan. Qaýipsizdik sharalary kúsheitilip, asa bir qajettilik bolmasa adamdardyń kóshede júrýine tyiym salynǵan.
