Shymkentte kópbalaly ana 9-qabattan sekirmek bolǵan. Áieldi politsiia qyzmetkerleri qutqaryp qaldy, - dep habarlaidy Tengrinews.kz agenttigi OTYRAR portalyna silteme jasap.
Basylym málimeti boiynsha, qaladaǵy kópqabatty úilerdiń biriniń shatyrynda áiel ózine qol jumsamaq bolǵan. Ony kórgender dereý politsiiaǵa habarlaǵan. Oqiǵa ornyna kelgen tártip saqshylary der kezinde qaiǵyly oqiǵanyń aldyn alǵan.
"Ol jerge baryp, áiel sekirmek bolyp turǵanyn kórdik. Jigittermen shatyrǵa shyqtyq, bizge jaqyn tur eken. Basynda sóilesip kórmek boldyq, biraq paida bolmady, ol sekirýge shaq qaldy. Onyń kóileginen ustap, ózimizge qarai tartyp aldyq, keiin ol julqyna bastady", - dedi politsiia qyzmetkeri Suńǵat Ábilov.
Politseilerdiń aitýynsha, áieldiń bul áreketke barýyna kúieýimen janjaldasyp qalýy sebep bolǵan. Áiel kúieýimen urysyp qalǵanyn, sondyqtan ózine qol jumsamaq bolǵanyn aitqan.
"Ony tynyshtandyryp, dárigerlerge tapsyrdyq. Mundai jaǵdailar jii kezdesedi, bizdiń mindetimiz qutqarý, adam ómirin saqtap qalý úshin bárin jasaý. Osydan keiin ony politsiia bólimine apardyq, ol birneshe kúnnen beri habar-osharsyz ketken eken. Onyń kúieýi de politsiia bólimine jetkizildi, qazir tergeýshiler barlyq mán-jaidy anyqtap jatyr", - deidi politsei Suńǵat Ábilov.
