Búgin fýtboldan Premer-liga komandalary arasyndaǵy el birinshiliginiń on ekinshi týrynda aýa raiynyń qolaisyzdyǵyna bailanysty eki oiyn keiinge shegerildi, dep habarlaidy QazAqparat.
Túrkistanda kezdesý bastalýyna sanaýly minýttar qalǵanda «Turan» men «Aqtóbe» arasyndaǵy kezdesý aýa raiynyń qolaisyzdyǵyna bailanysty keiin ótkiziletin boldy. Sol ýaqytta atalǵan qalada shańdy daýyl soǵyp, oiyn ótkizýge múmkindik bolmaǵan.
Osyndai jaǵdaiǵa bailanysty Shymkenttegi «Ordabasy» men Pavlodar oblysynyń «Aqsý» klýbtarynyń kezdesýi oiyn ortasynan toqtatyldy. Qatty jel men shańdy daýyl saldarynan stadionnyń shatyry ushyp ketip, alańǵa tústi. Bul ýaqytta shymkenttik klýb qarsylasynan 1:0 esebimen basym túsip jatqan bolatyn.
Qazaqstan fýtbol federatsiiasy atalǵan oiyndardyń qashan ótkiziletini týraly aldaǵy ýaqytta sheshimin aitatyn bolady.
Sondai-aq, ótken týrdaǵy jeńisinen keiin elordalyq «Astana» týrnir kestesinde kósh basyna shyqqan edi. Bul joly syrt alańda «Atyraýmen» 1:1 esebine qanaǵat bildirdi.
Al almatylyq «Qairat» óz alańynda Qaraǵandynyń «Shahterin» 2:0 esebimen tize búktirdi. Osylaisha on birinshi týrdaǵy sátsizdiginen keiin nátije shyǵaryp, jankúierler aldynda senimdi oiyn kórsetti.
Erteń, 22 mamyrda «Qyzyljar» (Petropavl) men «Aqjaiyq» (Oral), «Tobyl» (Qostanai) men «Maqtaral» (Túrkistan oblysy), «Kaspii» (Aqtaý) men «Taraz» komandalary kezdesedi.
