Shymkenttik tártip saqshylary qýatty bomba jarylysy bolatyndyǵy týraly jalǵan aqparat taratqan eki áieldi ustady, – dep habarlaidy QR IIM baspasóz qyzmeti.
Ishki ister organdary ustalǵandarǵa qatysty QR QK 247-baby 1-bóligi boiynsha sotqa deiingi tergeý amaldaryn júrgizip jatyr. Sońǵy táýlikte atalǵan bap boiynsha úsh qylmystyq is qozǵalǵan.
«QR IIM turǵyndardy áleýmettik jeliler men túrli messendjerler arqyly taralatyn jalǵan aqparatqa senbeýdi jáne úreige boi aldyrmaýdy suraidy. Resmi aqparat turaqty túrde arnaiy qurylǵan jedel shtab arqyly taralady» delingen habarlamada.
Sonymen qatar, QR Ishki ister ministrligi Arys qalasynda qaza bolǵan adamdardyń sany úsheý ekenin resmi túrde rastap otyr. Habarlanǵandai, kóz jumǵandar sany budan da kóptigi týraly áleýmettik jelide taraǵan aqparat - jalǵan.
«Eger de azamattar zardap shekken adamdar týraly qandai da bir qosymsha derekterge ie bolsa, resmi túrde Ishki ister ministrligine shaǵymdanýǵa shaqyramyz» dedi IIM-nen.
Buǵan deiin, bomba jarylatyndyǵy týraly aqparat taratyp, jurt arasynda dúrbeleń týǵyzǵan bir adamnyń ústinen qylmystyq is qozǵalǵan bolatyn. Shymkent qalalyq Politsiia departamentiniń aqparatyna sáikes, shahardaǵy evakýatsiialyq beketterdiń birinde Arys qalasynyń turǵyny «Arysta qýatty bomba jarylyp, Shymkentke jetedi» degen habarlamany estip, sol jerdegi adamdarǵa taratqan.
«Atalǵan jait boiynsha QR QK-niń 274-baby 1-bóligi «Kórineý jalǵan aqparat taratý, iaǵni qoǵamdyq tártipti buzý nemese azamattardyń nemese uiymdardyń quqyqtary men zańdy múddelerine ne qoǵamnyń nemese memlekettiń zańmen qorǵalatyn múddelerine eleýli ziian keltirý qaýpin tóndiretin kórineý jalǵan aqparat taratý» boiynsha sotqa deiingi tergep-tekserý amaldary júrgizilýde» dedi resmi mekemeden.
