Shymkentte ataýly áleýmettik kómek alý úshin 7 596 otbasy tabysyn jasyrǵan. Bul týraly qalalyq Jumyspen qamtý jáne áleýmettik qorǵaý basqarmasynyń basshylyǵy málimdedi, dep habarlaidy "Ult aqparat".
Basqarma basshysy Ǵalymjan Baltaevtyń sózinshe, búgingi kúnge deiin 62 731 ótinish qaralyp, 9801 ótinish (15,6%) keri qaitarylǵan. 2 149 otbasyǵa 1 530 mln teńgege taǵaiyndalǵan tólemder tolyq toqtatylǵan. Onyń 70,6 mln teńgesi biýdjetke qaitarylǵan. Taǵy 3 otbasy 828,4 myń teńgeni óz erkimen biýdjetke qaita tólegen. Sonymen qatar, 5 447 otbasynyń áleýmettik tólemderine qaita esepteý jumystary júrgizilip, 5 358 otbasynyń tólemderi qaita eseptelip, taǵaiyndalǵan soma 1 037,4 mln teńgege kemitildi.
«Atalǵan tapsyrma aiasynda, aýdandarda óńirlik komissiialar qurylyp otyr. Komissiia quramynda: aýdan ákiminiń orynbasary, salyq organynyń ókili, ýchaskelik politsiia ókili, qoǵamdyq birlestikter ókili, jumyspen qamtý basqarmasynyń mamany bar. Olar ataýly áleýmettik kómek alýshylardy úime-úi aralap, tabystaryn qaita qaraý jumystary júrgizilýde»,- dedi Ǵalymjan Baltaev.
