Shymkent garnizonynyń áskeri soty "Aqtas" oqý ortalyǵynyń aǵa mamany, № 65 áskeri bólimi atys alańynyń bastyǵy qolastyndaǵylardy uryp-soǵyp, qyzmettik ókilettiligin asyra paidalanǵany úshin úsh jylǵa bas bostandyǵynan aiyryldy.
Áskeri qyzmetkerge qatysty qylmystyq is Qazaqstan Respýblikasy Qylmystyq kodeksiniń 451-babynyń birinshi bóligi "Bilikti nemese qyzmettik ókilettikterdi asyra paidalaný" jáne 450-babynyń birinshi bóligi "Bastyqtyń nemese laýazymdy adamnyń bilikti nemese qyzmet babyn ózi nemese basqa adamdar nemese uiymdar úshin paida men artyqshylyqtar alý ne basqa adamdarǵa nemese uiymdarǵa ziian keltirý maqsatynda qyzmet múddelerine qaishy teris paidalaný" boiynsha qaraldy, dep habarlady Shymkent garnizony áskeri sotynyń baspasóz qyzmeti.
Sottyń anyqtaýynsha, ótken jyldyń qazanynda sottalýshy jábirlenýshige buiryq bergen, alaida buiryq durys oryndalmaǵan. Ashýǵa býlyqqan sottalýshy onyń aýzynan, birneshe ret basynan tepken. Qolymen jáne temir qubyrmen betinen urǵan.
Bul iste taǵy bir áskeri qyzmetkerdiń jaraqat alǵany anyqtaldy. Ony burynǵy bastyǵy "buiryqty durys oryndamaǵany úshin" betinen, basynan, arqasynan urǵan.
Sonymen qatar ótken jyldyń tamyzynda sottalýshy qolastyndaǵy tórt qyzmetkerdi qujat júzinde jumystan bosatyp alyp, úiine aparyp túrli qurylys jumysyn istetken.
Sot talqylaýynyń nátijesinde, Shymkent garnizony áskeri soty qylmystyq isti sottalýshynyń jábirlenýshilermen tatýlasýyna bailanysty Qylmystyq kodekstiń 451-babynyń birinshi bóligi (Bilikti nemese qyzmettik ókilettikterdi asyra paidalaný) boiynsha qylmystyq isti toqtatty.
Sottalýshy Qylmystyq kodekstiń 450-babynyń birinshi bóligimen kináli dep tanyldy (Bastyqtyń nemese laýazymdy adamnyń bilikti nemese qyzmet babyn ózi nemese basqa adamdar nemese uiymdar úshin paida men artyqshylyqtar alý ne basqa adamdarǵa nemese uiymdarǵa ziian keltirý maqsatynda qyzmet múddelerine qaishy teris paidalaný). Oǵan úsh jyl bas bostandyǵynan aiyrý týraly úkim shyqty. Sondai-aq, ómir boiy belgili bir laýazymdy atqarý nemese belgili bir qyzmetpen ainalysý quqyǵynan, áskeri ataǵynan aiyryldy.
