videodan kadr
Shymkenttegi áskeri bólimde boryshyn ótep júrgen sarbaz jyndyhanadan bir-aq shyqty. 35748 artilleriia divizionynyń jaýyngeri Samrat Tynyshtyqbai osydan bes kún buryn ǵana saý bolǵan deidi týystary. Bul týraly "KTK" telearnasy habarlady.
Biraq ol keiingi eki-úsh kúnde esinen adasyp, aiaq asty ózgerip ketken. 20 jastaǵy jaýyngerdiń týystary bul áskeri bólimdegi álimjettiktiń kesiri bolýy múmkin dep kúdiktenedi.
Byltyr kóktemde ǵana Qyzylordadan áskerge alynǵan Samrat jyl ótpei jatyp jyndyhanaǵa jatqyzyldy. Týystary buǵan áskeri bólimdegilerdiń qatysy bar dep topshylaidy. Sebebi osydan bes kún buryn ǵana aýyldan anasy men ájesi kelgende uly saý bolǵan eken. Arada birer kún ótken soń Samrat psihikalyq aýytqýy bar naýqastarǵa arnalǵan aýrýhanadan bir-aq shyqqan.
"Kúdigimiz bar, urǵan bolýy kerek. Áitpese eki kúnde ol búitip jyndy adam qusap qalmaidy ǵoi. Jyndy adam siiaqty bop qalǵan. Ony qorqytyp, úrkitip, uryp-soǵyp, sony bildirmeitin qylǵan. Jańa bireý "psihotrop zat salyp jiberýi de múmkin" dedi. Sap-saý balany eki kúnniń ishinde áskeri bólim psihaýrýhanaǵa jatqyzǵan. Ne degen ońbaǵan adamdar!" - dedi sarbazdyń apasy Saltanat Tynyshtyqbai.
Al áskeri bólimdegiler týystarynyń kúdigin joqqa shyǵarady. Kúndelikti qyzmet etip, úlgili sarbaz retinde tanylǵan Samrat tańǵy sap túzeý kezinde túsiniksiz áreket istei bastady deidi. Tipti qarýlastaryna ámir berip, pármenderdi tyńdaýdy qoiǵan soń, meditsinalyq rotaǵa jiberdik dep aqtalyp jatyr.
"Balalarǵa ózinen-ózi basqa turyp, úndemei sapta turady da, biraq sóilep turady, birdeńe dep. Mysaly, "sapqa turyńdar" dep aiqailaidy. Ózimen-ózi. Sosyn óleń aitady. Bárimiz bir sapta turǵannan keiin belgilengen tártip bar. Ol tártipke baǵynamyz. Ol tártipke baǵynbai, bir teris qylyqtar jasady", - dedi 35748 áskeri bólimi artilleriia divizionynyń komandiri Ádilet Kenjebekov.
20 jastaǵy sarbazdy kesheli beri tekserip jatqan psihikalyq emdeý ortalyǵynyń mamandary esinde kemistigi bar ekeni anyq deidi. Biraq naqty diagnoz áli qoia almaimyz dep otyr.
"Kelip túsken kezde psihikasynyń qatty buzylǵany baiqaldy. Qazir naýqas statsionarlyq tekserýge jáne emdelýge jatqyzyldy. Diagnozy áli qoiylǵan joq. Tekserilip jatyr. On kúnniń ishinde diagnoz qoiylady", - dedi Shymkent psihikalyq densaýlyq ortalyǵynyń bólim mamany Sýhrab Ábdiqadyrov.
Mamandar bul mekemede kem degende bir ai jatady dep otyr. Al sap-saý ulyn esinen tandyrǵan áskeri bólimdegiler ekenine senimdi jaqyndary áskeri prokýratýra ainalysyp, beinekameralardy jiti zertteýin talap etip otyr.
