Foto: © otyrar.kz
Shymkentte 18 jastaǵy turǵyn OTYRAR basylymynyń jýrnalisterine kúieýinen kórgen zábiri týraly aityp berdi, - dep habarlaidy Tengrinews.kz saity.
Onyń sózinshe, birde kúieýi bótelkemen ishinen uryp jiberip, 18 jastaǵy turǵyn tuńǵysh balasyn túsirip alǵan.
"Sońǵy ret meni aiaýsyz uryp, kóshede qaldyryp ketti. Qazir ekinshi balama aiaǵym aýyr, balammen kóshede qaldyryp ketti. Tuńǵyshymdy ol eki litrlik bótelkemen ishimnen uryp jibergen kezde túsirip aldym. Sol kúni bólmede kiimder shashylyp jatty, ol ashýlanyp, maǵan aiǵailap, ura bastady. Sosyn dalaǵa súirep shyǵyp tezek jinatty. Artynan meni sol tezekti jeýge májbúrleitinin aitty. Sodan keiin kóligine otyrǵyzyp, bir jaqqa alyp ketti. Kóshede ursysyp qalǵanbyz, ol kólikke otyryp, men kóliktiń tutqasyn ǵana ustap qaldym. Qolymdy alyp úlgermei, ishimmen qulap tústim. Ol meniń qulaǵanymdy kórip, kúlip, ketip qaldy", - deidi Jansaia.
Bul oqiǵadan keiin zábir kórgen áiel jansaqtaý bólimine túsken. Biraq kúieýiniń mundai áreketterge barǵanyn jaqyndaryna aitpaǵan. Sebebi olar túsinbeidi dep, Jansaianyń ózin kinálaýy múmkin dep oilaǵan.
"Uryp júrgenin múlde bilgen emespin. Bizdi aralastyrmaityn. Qyzym turmysta osylai qinalyp júrgenin 26 naýryzda aýrýhanaǵa túsip qalǵan kezinde bildim. Bilgen boida birden aryz jazdym. Onyń kesirinen tuńǵysh balasynan aiyrylyp qalǵanyn da bilmedim. Ol tiisti jazasyn alǵanyn qalaimyn! Ol meniń qyzymdy qalai ursa, ony da solai ursyn", - deidi jábirlenýshiniń anasy.
Al Jansaianyń kúieýi bul jaitty moiyndamaǵan. Ol eshqashan qol kótermegenin aitqan. Onyń sózinshe, áielimen minezi sai kelmegendikten ekige ketýdi sheshken.
"Ol politsiiaǵa aryzdanǵanymen olar bul ispen ainalysqysy kelmeidi. Eger men ony rasynda urǵan bolsam, ol aýrýhanaǵa túsken kúni-aq meni politseiler ustap áketer edi. Ol basqa sebeppen ketti. Minezimiz sai bolmady", - deidi Mansur.
Oqiǵanyń mán-jaiyn politseiler anyqtaidy.
"Samal-3 shaǵynaýdanynyń turǵyny 23 naýryzda aryz jazdy. Ol kúieýinen zábir kórip júrgenin, ol jii qol kóteretinin aitty. Bul derek Abai aýdany politsiia basqarmasynyń biryńǵai tiziliminde tirkelgen. Saraptama taǵaiyndaldy. Saraptama nátijeleri boiynsha sheshim qabyldaidy", - deidi Shymkenttiń Abai aýdanynyń PB ýchaskelik inspektory Baýyrjan Qoshtaev.
