Shymkentte 12 jastaǵy qyz órtenip jatqan úiden egiz baýyryn aman alyp qaldy, - dep habarlaidy Tengrinews.kz tilshisi "Otyrar" saityna silteme jasap.
Oqiǵa 15 shildege qaraǵan túni Qainarbulaq saiajaiy aýmaǵynda bolǵan. Órt bastalǵan kezde úide ata-anasy bolmaǵan. Qyz oryndyq janyp jatqanyn kórgen. Ol órtti sóndirýge tyrysqan, biraq jalyn tym kúshti bolǵan. Osy kezde bólmede qyzdyń bir jasar egiz baýyry uiyqtap jatqan. Ápkesi kóp oilanbastan olardyń birin ustap kóshege alyp shyǵady. Keiin órtenip jatqan úige oralyp, ekinshisin kóterip alyp shyqqan.
"Balalardy birinen soń birin úiden shyǵaryp alǵan. Maǵan: "Anashym keshirińizshi, men baýyrymdy shyǵarǵan soń, ony jerge jatqyzyp kettim. Óitkeni ary qarai taǵy júrý kerek boldy, keshirińizshi" deidi. Shynymdy aitsam, ózim shoshyp kettim, ol bala ǵoi, ózi de qorqyp qashýy múmkin edi. Sodan soń, uzaq ýaqyt aiaǵy dirildep otyrdy, qorqyp ketipti. Keiin balalardy kórshige apardyq, úi tolyǵymen órtenip ketkenin aitpadyq", - dep eske alady Mariia Savorovskaia.
Órt qutqarýshylar jetkenshe aýyzdyqtalǵan. Áieldiń aitýynsha, órttiń sebebi jeldetkishtegi symdardyń qysqa tuiyqtalýy bolýy múmkin.
"Jeldetkish oryndyqtyń dál ústinde ilinip turatyn. Meniń oiymsha, symdar tuiyqtalyp qaldy. Divan men kreslo ishinde sintetikalyq mata bar, ol tez tutanady. Biz kelgende, terezede bári janyp jatqanyn kórdik. Sý shasha bastadyq, bizde bassein bar, tez sý tasydyq. TJD da tez jetti, biraq bul ýaqytta bárin sóndirip bolǵanbyz", - dedi Mariia Savorovskaia.
Er adam órtten zardap shekken otbasyǵa óz erkimen kómek kórsetken. Úsh balasy bar otbasyǵa ýaqytsha baspana jáne azyq-túlikpen kómek kórsetildi. Qazir olar órtengen úidi qalpyna keltirýge tyrysyp jatyr.
