Shymkent búginnen bastap eldegi tótenshe jaǵdai rejimi aiaqtalǵansha karantinge jabyldy. Osyǵan qarai qala ákimi Murat Áitenov qalyń kópshilikke úndeý jariialady, dep habarlaidy "Ult aqparat Shymkent qalasy ákimdiginiń resmi saityna silteme jasap.
M.Áitenov qalada koronavirýspen kures sharalary tiisti deńgeide júrgizilip jatqanyn málimdedi. Sondai-aq ol Shymkentte indet juqtyrǵandar sany 11-ge jetkenin aitty.
– Azamattardyń ómiri men qaýipsizdigin, densaýlyǵyn saqtaý maqsatynda 2020 jylǵy 4 sáýiri saǵat 21.00-den bastap tótenshe jaǵdai aiaqtalǵanǵa deiin Shymkent qalasy aýmaǵynda karantin jariialanady.
Karantin mynandai shekteý sharalaryn qamtidy:
Birinshiden, karantin kezinde Shymkent qalasy bas sanitarynyń qaýlysynda kórsetilgen mekemelerden bólek menshik nysanyna qaramastan barlyq mekemelerdiń jumysy toqtatylady. Ol mekemelerdiń tizimin ákimdiktiń resmi saity men áleýmettik jelilerde jariialaimyz. Qoǵamdyq demalys oryndary, sonymen qatar saiabaqtar men balalar alańshalaryna barýǵa bolmaidy.
Ekinshiden, turǵyndar men kóliktiń barlyq túrine Shymkent qalasynan shyǵýǵa jáne qalaǵa kirýine tyiym salynady. Bul shekteýdiń Qaýlyda kórsetilgen belgili azamattar men kólikterge qatysy joq. Olardyń da tizimi jariialanady.
Úshinshiden, qala aýmaǵynda shaǵyn mikroavtobýstardyń qozǵalysyna tyiym salynyp, olardyń baǵyttary boiynsha avtobýs qozǵalysy qoiylady. Qalaishilik qoǵamdyq kólik qozǵalysy tańǵy 07.00-den 19.00-ge deiin ǵana júzege asady.
Tórtinshiden, qala aýmaǵyndaǵy zalalsyzdandyrý sharalary karantin merzimi aiaqtalǵanǵa deiin kúsheitiletin bolady.
Besinshiden, azamattardyń júrip-turýyna shekteý qoiylady. Bul turǵyndardyń ózin-ózi oqshaýlaýy úshin jaǵdai jasaýǵa baǵyttalyp otyr. Mundai shekteýler meditsina qyzmetkerlerine, quqyq qorǵaý organdarynyń ókilderine, qala tynys-tirshiligin qamtamasyz etýshi kommýnaldyq mekeme qyzmetkerlerine qoldanylmaidy.
Qala turǵyndary tolyqtai shekteý kezinde úilerinen azyq-túlik, dári-dármek, meditsinalyq kómek, bank jáne poshta qyzmetterin alý úshin ǵana shyǵa alady.
Sońǵy kúnderi áleýmettik jelilerde tarap jatqan túrli negizsiz aqparattar taralýynyń aldyn alý maqsatynda, qala aýmaǵynda kommendattyq saǵat ázirshe engizilmegenin resmi túrde málimdeimin. Degenmen tótenshe jaǵdai kezindegi talaptardy oryndaýymyz kerek. Karantin rejimin buzǵan azamattardy quqyq qorǵaý organdarynyń patrýldik qyzmeti anyqtaityn bolady. Sebebi óziniń densaýlyǵyna nemquraily qaraǵan azamattardyń áreketinen turǵyndardyń basym bóligi zardap shekpeýi tiis dep sanaimyn.
Altynshydan, Shymkent qalasynyń aýmaǵyndaǵy tótenshe jaǵdai jáne karantin kezinde 55 jastan asqan turǵyndarǵa asa bir qajettiliksiz kóshege shyqpaýdy usynamyz.
Jetinshiden, karantin kezinde tizim boiynsha jumysy toqtamaǵan barlyq mekemeler qyzmetkerin jumys orny týraly anyqtamamen qamtamasyz etýi shart.
Segizinshiden, azyq-túlik bazarlarynyń jumys ýaqyty 10:00-den 18:00-ge deiin, qadamdyq qashyqtyqtaǵy azyq-túlik dúkenderiniń jumys ýaqyty 10:00-den 21:00-ge deiin bolyp qalady.
Toǵyzynshydan, barlyq qoǵamdyq tamaqtaný oryndary jetkizip berý rejimine kóshedi.
Onynshydan, azamattardyń qala aýmaǵynda jeke kóligimen júrýine tyiym salynady. Bul talap tizimge kiretin mekeme qyzmetkerlerine qoldanylmaidy jáne ol azamattardyń qolynda jumys orny bergen anyqtama bolýy kerek. Sondai-aq, jeke kólikpen úiiniń janynda ornalasqan azyq-túlik pen birinshi kezektegi taýarlar, meditsinalyq quraldar alýǵa jáne jedel jaǵdailarda meditsina uiymdaryna kómek alýǵa barýǵa bolady, dedi.
Sóz sońynda qala basshysy:
– Qalanyń tynys-tirshiligi toqtamaýy úshin qala ákimdigi barlyq sharalardy qabyldaidy.
Osyndai qiyn sátte, Shymkentti jan-tánimen súietin árbir turǵynǵa qalamyz bizdiń kómegimizge zárý ekendigin airyqsha atap ótkim keledi. Qalamyzǵa tigizer kómegimiz – bul bizdiń birkisidei karantin talaptaryn buljytpai oryndaýymyzda ekendigin atap ótemin, dedi.
