Foto:t.me/ainura_zarina
Shymkent qalasynyń prokýrory Ǵabit Muqanov sońǵy úlgidegi Toyota Land Cruiser kóliginiń jalǵan nómirlerine qatysty janjal úshin qaramaǵyndaǵy qyzmetkerdi jazalady. Jol talǵamaityn kólik aýdandyq prokýratýranyń mańynan baiqalyp, jelidegiler ol qadaǵalaý organynyń qyzmetkerine tiesili ekenin jazǵan, - dep habarlaidy Tengrinews.kz tilshisi.
Áńgime Abai aýdany prokýratýrasynyń bólim bastyǵy Aman Qojabaev týraly bolyp otyr. Qaznet qoldanýshylary ol Toyota Land Cruiser kóligine jalǵan nómir taqqanyn jazǵan. Qalalyq prokýratýra bul kólikte bóten adamnyń nómirleri ilingenin rastady. Alaida qadaǵalaý organy jol talǵamaityn kólik Qojabaevtiki ekenin joqqa shyǵardy.
"Qala prokýratýrasynyń ishki qaýipsizdikti qamtamasyz etý qyzmeti qyzmettik tergeý júrgizdi. Toyota Land Cruiser markaly avtokólik Qojabaevqa tiesili emes ekeni anyqtaldy. Kórsetilgen kúni (jol talǵamaityn kólik Abai aýdany prokýratýrasynyń kólik turaǵynda bolǵan kezde - avt.), iaǵni biyl 18 naýryzda Abai aýdanynyń prokýratýrasyna onyń dosy B.Áshir kelgen", - delingen Shymkent prokýrorynyń birinshi orynbasary Nurjan Seidalievtiń qoly qoiylǵan jaýapta.
Jol talǵamaityn kólikte 001 PR 17 memlekettik nómiri taǵylǵan. Prokýratýra málimetinshe, olar jalǵan bolyp shyqty jáne júrgizýshi Toyota Land Cruiser kóligimen qalada zańsyz júrgen.
"Abai aýdany prokýratýrasynyń aýmaǵyna jurtshylyqtyń synyna ushyraǵan úshinshi tulǵanyń avtokóligin ótkizgeni úshin 28 naýryzda Abai aýdandyq prokýratýrasynyń bólim basshysy Aman Qojabaev qala prokýrorynyń buiryǵymen eskertý túrindegi tártiptik jaýapkershilikke tartyldy", - dep qosty Seidaliev.
Qadaǵalaý organy 001 RR 17 memlekettik nómiri Aster Auto Shymkent jeke kompaniiasynda tirkelgenin atap ótti. Alaida, byltyr qyrkúiekte bul nómir tirkeýden alynyp, oǵan jańa kólik bekitilmegen.
Buǵan deiin áleýmettik jelilerde Aman Qojabaev Shymkenttiń eks-prokýrory jáne Sybailas jemqorlyqqa qarsy qyzmet bastyǵynyń burynǵy orynbasarynyń uly ekeni habarlanǵan bolatyn. Alaida prokýratýra bul málimdemeni rastaǵan da joq, joqqa da shyǵarmady.
"Aman Qojabaevtyń eńbek jáne otbasylyq qatynastary týraly málimetter jeke aqparat sanalady jáne olardy jariia etýge bolmaidy", - dep qorytyndylady prokýratýra ókili.
Eske salaiyq, naýryzdyń ortasynda Shymkenttegi aiyp turaǵyna Toyota Land Cruiser jol talǵamaityn kóligi qoiylǵan, onyń iesi kólikti jalǵan nómirmen júrgizgen bolyp shyqty. Jeli qoldanýshylary ony Shymkenttegi Abai aýdany prokýratýrasynyń kólik turaǵynan kórgen. Olardyń aitýynsha, jol talǵamaityn kólikke taǵylǵan memlekettik nómirler basqa kólikke jazylyp, qaita tirkelmegen.
Sot jalǵan nómirmen kólik júrgizgen Toyota Land Cruiser júrgizýshisin jazalaǵan. 4 sáýirde er adam ÁQBtK 590-babynyń 4-bóligi ("Kólik quraldaryn paidalaný qaǵidalaryn buzý") boiynsha jaýapqa tartylǵan.
