Shymkent ákimdigi balalardyń jazǵy demalysyna bólingen qarjyny memleket qazynasyna qaitarady. Bul týraly QR Qarjy ministrligi Memlekettik satyp alýlar zańnamasy departamentiniń direktory Sábit Ahmetov aitty, dep habarlaidy "Ult aqparat".
Ortalyq kommýnikatsiialar qyzmetindegi baspasóz máslihatynda BAQ ókilderi departament direktorynan «memlekettik satyp alýlar saitynda Shymkent ákimdigi shamamen 200 mln teńgege 6 myń balaǵa jazǵy saýyqtyrý lagerine joldama satyp alý týraly lot ornalastyrǵanyn, jazǵy lager bolmaǵandyqtan atalǵan satyp alýdyń taǵdyry ne bolatyndyǵyn» suraǵan edi.
«Biz Shymkent qalasy ákimdiginen karantinge bailanysty lagerlerde eshqandai demalys bolmaǵandyǵy týraly aqparat aldyq. Máslihat sheshimimen atalǵan aqsha sheship alyndy. Bul qyzmetterdiń kelisimshart jasalǵan áleýetti jetkizýshisine kelisimsharttyń buzylatyndyǵy týraly habarlama jiberildi», - dep túsindirdi Sábit Ahmetov.
