Shyǵys Qazaqstan oblysynda qutqarýshylar «Zymyran-2021» arnaiy taktikalyq oqý-jattyǵýyn ótkizdi, dep habarlaidy QazAqparat.
ShQO tótenshe jaǵdailar departamenti baspasóz qyzmetiniń málimetine súiensek, arnaiy taktikalyq oqý-jattyǵý Glýbokoe aýdanynda ótti.
Ańyz boiynsha TJD kezekshisine «Baiqońyr» ǵarysh ailaǵynan ushqan zymyran tasyǵysh fragmentteriniń óńir aýmaǵyna qulaǵany týraly habar kelip tústi.
Sol jerge apatty jedel joiý úshin azamattyq qorǵaý qyzmetteri kelip jetti.
Sonymen qatar oblystyq jáne aýdandyq ákimdikte tótenshe jaǵdailar jónindegi komissiialardyń shuǵyl otyrysy ótkizildi.
Qoǵamdyq tártipti qorǵaý qyzmeti zymyran tasyǵyshtyń qulaǵan jerin túgel qorshap tastady.
TJ aimaǵyndaǵy aýyl turǵyndary qalyptasqan jaǵdai týraly signaldyq-daýys qurylǵylarymen jabdyqtalǵan avtokólikterdiń kómegimen habardar etildi.
Qutqarýshylar turǵyndar men janýarlardy oqiǵa ornynan evakýatsiialady. Tarhanka aýylynyń halqy ornalastyrý pýnktine jetkizildi.
Onda azamattarǵa úsh ýaqyt ystyq tamaq pen birinshi kezekte qajetti zattar berildi. Evakýatsiialanǵan halyqpen psihologtar jumys júrgizdi.
Órt sóndirýshiler qyzyl jalyn oshaqtaryn tolyqtai aýyzdyqtady.
Jergilikti atqarýshy organ ókilderi TJ aimaǵynda himiialyq zaqymdaný deńgeiin anyqtaý jáne apat aýmaǵyn qalpyna keltirý jumystaryn uiymdastyrdy.
«Taktikalyq arnaiy oqý-jattyǵýǵa jeke quramnan 30 adam men 10 tehnika jumyldyrylǵan. Mundaǵy basty maqsatymyz – zymyran tasyǵyshtan bolǵan tótenshe jaǵdaidyń saldaryn joiýǵa azamattyq qorǵaý qyzmetteriniń deńgeiin arttyrý», - deidi oblystyq TJD bastyǵynyń orynbasary Dmitrii Titov.
