Shyǵys Qazaqstan oblysy Abai aýdanyndaǵy 3500 gektar aýmaqty qamtyǵan alapat órt sóndirildi, dep habarlaidy "Ult aqparat" Tótenshe jaǵdailar komitetiniń baspasóz qyzmetine silteme jasap.
Bul jóninde Tótenshe jaǵdailar komitetiniń resmi ókili Nursultan Nurahmetov málim etti. Onyń aitýynsha, tilsiz jaý búgin saǵat 16:13-te tolyq sóndirilgen.
Eske sala keteiik, 24 qyrkúiek kúni bastalǵan órt Abai aýdanyndaǵy taýly, jartasty, adam júre almaityn jerdegi shóp alqaptaryn sharpyǵan bolatyn. Órt aýmaǵy – shamamen 3500 gektar. Eldi mekenderge qaýip tóngen joq.
Tilsiz jaýdy aýyzdyqtaýǵa oblystyq TJD, Ulttyq ulan áskeri bólimi men jergilikti atqarýshy organdardyń kúsh-quraldary jumyldyrylǵan. Oqiǵa ornynda barlyǵy 242 adam jáne 29 tehnika jumys istedi.
