Shyǵys Qazaqstan oblysynda KSRO tólqujatymen júrgen 160-tan astam adam anyqtaldy, dep habarlaidy QazAqparat.
ShQO politsiia departamenti baspasóz qyzmetiniń málimetine súiensek, kóshi-qon qyzmetiniń mamandary jeke basyn kýálandyratyn qujatsyz turatyn jáne 1974 jylǵy úlgidegi KSRO pasporttaryn ýaqtyly aýystyrmaǵan adamdardy anyqtaýda.
Olar qujattardyń bolmaýyna bailanysty meditsina, bilim berý qyzmetterin ala almaýda, járdemaqy men zeinetaqydan qur qalyp, resmi jumysqa ornalasýǵa múmkindigi de joq.
Jyl basynan beri KSRO tólqujatymen júrgen 160-tan astam adam QR azamaty bolyp tanylǵan.
Máselen, Ulan aýdanynyń politsiia bólimine júgingen 61 jastaǵy er adam 90-jyldary Ýkrainada berilgen 1974 jylǵy úlgidegi tólqujatpen Qazaqstanǵa kelgen.
«Ulan aýdanynda turǵan azamat jumys istep, otbasyn qurǵan, balalary da bar. Órt kezinde tólqujaty órtengendikten, er adam 26 jyldan astam ýaqyt boiy Ýkrainadan onyń qujattaryna qatysty jaýap kelmeýine bailanysty jeke basyn kýálandyratyn qujatsyz ómir súrdi» , - dedi oblystyq PD bastyǵy Saǵat Mádiev.
Kóshi-qon qyzmetiniń ókilderi Qazaqstan Respýblikasynyń elshiligi arqyly Ýkrainadan qajetti qujattardy suratýǵa járdem kórsetti.
Osylaisha, er adam QR azamatynyń jeke kýáligin aldy. Endi ol basqa qazaqstandyqtarmen teń dárejede barlyq memlekettik qyzmetterge qol jetkize alady.
