Shyǵys Qazaqstan oblysynda áleýmettik mańyzy bar azyq-túlik baǵasyna baqylaý kúsheitilýde, dep habarlaidy "Ult aqparat".
Jyl basynan beri óńirde kókónistiń, kúnbaǵys maiynyń, qant pen sút ónimderiniń baǵasy birshama ósken. Sarapshylardyń aitýynsha, bul ótken jylǵy egin ónimderiniń azaiýynan, kommýnaldyq qyzmetter tarifteriniń qymbattaýynan jáne Resei Federatsiiasynan keletin qaptama materialdar baǵasynyń joǵarylaýynan boldy.
1 shildeden bastap «Saýda qyzmetin retteý týraly» zańǵa jasalǵan túzetýler kúshine engen. Endi jergilikti atqarýshy organdar áleýmettik mańyzy bar azyq-túlikti satýshylardyń baǵany 15 paiyzdan asyrmaýyn qadaǵalaityn bolady. Osy erejeni buzǵandarǵa ákimshilik jaýapkershilik qarastyrylǵan.
Óskemen qalalyq máslihatynyń hatshysy Aleksandr Svetashtyń aitýynsha, shaharda áleýmettik mańyzy bar taýarlardyń baǵasyn turaqtandyrý boiynsha arnaiy monitoringtik toptar jumys isteidi. Qazirgi ýaqytta olar kásip ókilderine zańnama normalaryn túsindirý maqsatynda saýda nysandaryn jii aralaýda.
«Baǵany retteý úshin qaladaǵy kásipkerlermen 210 memorandým jasaldy. Sondai-aq biz áleýmettik mańyzy bar azyq-túlik taýarlaryn satatyn 30 saýda ornyn iske qostyq. Jospar boiynsha 2021-2022 jyldary turaqtandyrý qoryna 2,9 myń tonna kartop, sábiz, piiaz, qyryqqabat jetkizilmek», - dedi Aleksandr Svetash.
Budan bólek, «Ertis» ÁKK-niń saýda pavilondarynda áleýmettik mańyzy bar taýarlardyń 8 túri 20 paiyzǵa deiingi tómen baǵada satylyp jatyr. Atap aitqanda, birinshi sortty un - 155 teńge, qant - 290 teńge, kúrish - 231 teńge, qaraqumyq - 325 teńge, kúnbaǵys maiy - 600 teńge, tuz - 50 teńge, kespe - 200 teńge, jumyrtqa - 300 teńge.
