Shyǵys Qazaqstan oblysynda tótenshe jaǵdai rejimi engiziledi. Tótenshe jaǵdailar ministrliginiń resmi ókili Talǵat Ýáli osylai málimdedi, dep habarlaidy "Ult aqparat".
«Iá, búgin Shyǵys Qazaqstan oblysynyń ákimdigi Ridder qalasynyń aýdanynda qalalyq aýqymdaǵy TJ jariialaidy», - dep jaýap berdi Talǵat Ýáli jýrnalisterdiń saýalyna.
Ol sondai-aq Ridderde órt tolyǵymen aýyzdyqtalǵanyn habarlady.
«Qazir ormannyń jekelegen ýchaskelerin sóndirý júrip jatyr. Keshke qarai mamandar barlyq jumyldyrylǵan kúshtiń kómegimen órtti tolyǵymen sóndiredi», - dedi ministrliktiń resmi ókili.
Eske sala keteiik, keshe Ridderde aýqymdy órt bolyp saldarynan eki adam aýrýhanaǵa túsip, 73 jastaǵy áiel adam kóz jumdy. Sońǵy derek boiynsha 283 gektar aýmaq otqa oranǵan.
Prezident Qasym-Jomart Toqaev Ridderdegi turǵyn úilerdi qamtyǵan iri orman órtine nazar aýdaryp, jaýapty oryndarǵa zardap shekkenderge der kezinde kómek kórsetý týraly tapsyrma berdi.
