videodan alynǵan kadr
Shyǵys Qazaqstan oblysynda qurbylary qatty soqqyǵa jyqqan qyz aýrýhanada jatyr. Bul aqparatty Shyǵys Qazaqstan oblysynyń densaýlyq saqtaý basqarmasy rastady, - dep habarlaidy Tengrinews.kz saity.
Jábirlenýshi qazir dárigerlerdiń baqylaýynda.
"Oǵan barlyq qajetti meditsinalyq kómek kórsetilip jatyr. Týystarynyń ótinishi boiynsha qyzdyń jaǵdaiy týraly tolyǵyraq málimet bere almaimyz", - dedi ShQO Densaýlyq saqtaý basqarmasy.
Qyzdy uryp-soǵý oqiǵasy osy jyldyń sáýir aiynda Óskemendegi saýda ortalyǵynda bolǵan. Jelige ortalyqtyń ájethanasynda túsirilgen video shyqty. Jazbada bir boijetken óziniń qurdasyn aiaýsyz soqqyǵa jyqqan sátin kórýge bolady. Qaqtyǵystyń taǵy bir qatysýshysy bolǵan oqiǵanyń barlyǵyn videoǵa túsirip alǵan. Oqiǵa jurtshylyqtyń narazylyǵyn týdyrdy. Osydan keiin Shyǵys Qazaqstan oblysynyń Sybailas jemqorlyqqa qarsy is-qimyl agenttigi áleýmettik jelide qurdasyn soqqyǵa jyqqan qyzdyń ákesi Antikor qyzmetkeri degen aqparat taratqan basylymdarǵa jaýap berdi. Alaida bul aqparat rastalǵan joq.
Buǵan deiin oblystyq politsiia oqiǵa biyl naýryz aiynyń basynda bolǵanyn habarlaǵan edi.
"Bul derek boiynsha QR Qylmystyq kodeksiniń 293-babynyń 2-bóligi boiynsha tirkeldi. Qazirgi ýaqytta sotaldy tergep-tekserý amaldary júrgizilip jatyr", - dedi ShQO Politsiia departmentiniń baspasóz qyzmeti ókilderi.
Kúni keshe soqqyǵa jyǵylǵan qyzdyń uryp-soǵý kezinde alǵan jaraqatyna bailanysty aýrýhanaǵa túskeni belgili boldy. Nemolchi.kz qorynyń jetekshisi Dina Tańsári da áleýmettik jelidegi paraqshasynda zardap shekken qyzdyń aýrýhanaǵa túskenin habarlady.
"Búgin qyz aýrýhanaǵa jetkizildi. Onyń jaraqaty kópke deiin ketpeidi, kóziniń ainalasyna qandai da bir suiyqtyq jinalyp qalǵan. Uzaq ýaqyt boiy isiný boldy. Sodan qatty aýyrsyný bastaldy. Búgin qatty aýyryp, shydai almaǵasyn, dárigerlerdi shaqyrttyq. Dárigerler ol qyzdy alyp ketti", - dep jazdy Dina Tańsari.
Oblystyq politsiia tergeý qupiiasyna bailanysty derekterdi jariialaǵan joq.
