Qazaqstan men Shveitsariia Prezidentteri keńeitilgen quramda kelissóz júrgizdi, dep habarlaidy "Ult aqparat" Aqordaǵa silteme jasap.
Keńeitilgen quramda ótken kelissóz barysynda Memleket basshysy Qazaqstan men Shveitsariianyń ekijaqty bailanystarynyń máni zor ekenin aitty.
– Sizdiń saparyńyz memleketterimiz arasyndaǵy yntymaqtastyqty damytýda zor mańyzǵa ie bolatynyna senimdimin. Bul yntymaqtastyq keń qanat jaiyp, órkendep keledi, sondai-aq, ekonomikalyq jáne saiasi salalardaǵy ózara tiimdi bailanystardyń qarqynyn arttyrý úshin barlyq kúsh-jigerimizdi jumsaimyz, – dedi Qasym-Jomart Toqaev.
Memleket basshysy eki el arasyndaǵy qatynastardy nyǵaitýǵa Tuńǵysh Prezident – Elbasy Nursultan Nazarbaevtyń qosqan mańyzdy úlesine toqtalyp, seriktestiktiń dástúrli negizi jalǵasa beretinin atap ótti.
– Biz búgin halyqaralyq yqpaldastyqtyń mańyzdy máselelerin talqyladyq, halyqaralyq kún tártibindegi negizgi problemalar jónindegi memleketterimizdiń ustanymy ortaq ekenine kóz jetkizdik. Shveitsariiany mańyzdy seriktes retinde qarastyramyz. Sondyqtan osy yntymaqtastyǵymyzdyń damý qarqynyn saqtaýymyz qajet, – dedi Qazaqstan Prezidenti.
Ýli Maýrer óńirdegi ekonomikalyq jáne saiasi bailanystardy damytý isindegi Qazaqstannyń negizgi róline nazar aýdardy.
– Qazaqstan biz úshin saiasi ári ekonomikalyq turǵydan Aziia men Eýropa arasyn jalǵastyrýshy kópir sanalady. Sizderdiń elderińizdiń álemdegi jáne halyqaralyq qoǵamdastyqtaǵy róli artyp keledi. Biz Aziia men Eýropa arasyndaǵy qarym-qatynastardy shynaiy, ashyq jáne tikelei talqylai alatyn, sondai-aq, qurlyqtar arasyndaǵy ózara yqpaldastyqty qamtamasyz etýge, ekonomikalyq qatynastardy nyǵaitýǵa birlese úles qosatyn Qazaqstan siiaqty seriktesimizdiń bar ekenine qýanyshtymyz, – dedi Shveitsariia Prezidenti.
Kelissózder barysynda saýda-ekonomikalyq jáne investitsiialyq yntymaqtastyqty jandandyrý, túrli salalardaǵy birlesken jobalardy júzege asyrý, qarjylyq qyzmet kórsetý sektoryndaǵy ózara yqpaldastyq máseleleri qarastyryldy.
Kezdesý sońynda Qasym-Jomart Toqaev seriktestik qatynastardy odan ári damytý jáne eki el arasyndaǵy ózara is-qimyldardyń múmkindigin arttyrý úshin Ýli Maýrer saparynyń máni zor ekenin aitty.
