«Qazaqfilm» kinostýdiiasy Shvetsiia Koroldigindegi Qazaqstan Respýblikasynyń elshiligi jáne «Shvetsiiadaǵy Qazaqstan jastary» uiymymen birlese otyryp, Stokgolmde 28 tamyz ben 1 qyrkúiek aralyǵynda Qazaq kinosynyń festivalin ótkizdi, dep habarlaidy "Ult aqparat".
«Qazaqfilm» kinostýdiiasynyń habarlaýynsha, atalǵan mádeni is-shara Aqan Sataevtyń «Anaǵa aparar jol» filmimen ashylǵan. Bul tarihi kinotýyndyny kórermenderge filmde basty róldi somdaǵan aktrisa Altynai Nógerbek tanystyrdy.
Sonymen qatar, festival barysynda Bolat Qalymbetovtyń «Talan», Turdybek Maidan jáne Tilek Tóleýǵazy túsirgen «Muzbalaq» animatsiialyq filmi, Baqyt Qaiyrbekovtyń «Qutyda janǵan alaý» derekti filmi, Erlan Nurmuhambetovtiń «Jańǵaq tal», Farhat Sháripovtyń «Tulǵalyq ósý treningi», Ádilhan Erjanovtyń «Tún qudaiy» jáne Rústem Ábdirashevtiń «Qazaq handyǵy. Almas qylysh» filmderi kórsetildi.
Shvetsiianyń kórermenderine otandyq týyndylardy «Qazaqfilm» kinostýdiiasynyń resmi ókili, prodiýser Diana Áshimova tanystyrdy.
Aita ketsek, filmderdiń barlyǵy tegin kórsetildi.
Eske sala ketsek, kommertsiialyq emes «Shvetsiiadaǵy Qazaqstan jastary» uiymynyń basty maqsaty – eki eldiń dostyǵy men tyǵyz bailanystaryn nyǵaitý, sondai-aq Shvetsiia men Qazaqstan jastarynyń arasynda mádeni dialog ornalastyryp, tájiribe almasýǵa múmkindik jasaý.
