Ortalyq kommýnikatsiialar qyzmetinde ótken onlain brifingide «Shuǵyla» qoǵamdyq qorynyń quryltaishysy Meiirhan Abdrahmanov koronavirýs indeti kezinde elimizdegi barlyq volonterdiń basyn qosyp, ottegi kontsentratsiiasyn alý úshin qarajatty qalai jinaǵany týraly aitty, dep habarlaidy QazAqparat.
«Pandemiia aiaq astynan boldy. Bastapqyda bizdiń elde ondai bolýy múmkin emes ekenine senip júrdik. Maýsym aiynda týysqandarymyz da, ózimiz de aýyra bastadyq. Sol kezde «Shuǵyla» qoǵamdyq qorynyń quryltaishylary, kásipkerler bas qosyp, halyqqa osyndai kezde kómektespegende qai kezde kómektesetinimizdi aittyq. Koronavirýsty emdeitin oryndar kóptep ashylǵanmen, ol jerde ottegi jetispei jatty. Ottegi jetispegendikten qanshama adam ómirden ozyp ketti. Bul máseleni ottegi kontsentratory sheshetinin bildik. Onyń eń yńǵailysy – 5 litrligi eken. Onyń Qazaqstandaǵy baǵasy Qytaimen salystyrǵanda 6-7 ese qymbat boldy. Sol sebepti birden Qytaidan satyp alýǵa sheshim qabyldadyq», - deidi «Shuǵyla» qoǵamdyq qorynyń quryltaishysy Meiirhan Abdrahmanov.
Onyń aitýynsha, bastapqyda kásipker jigitter birigip, 50 ottegi kontsentratoryna tapsyrys bergen.
«Ottegi kontsentratoryn alatynymyz týraly aqparatty áleýmettik jelilerge jariialadyq. Blogerler de aqparat taratýǵa atsalysty. Osylaisha 2 apta ishinde 450 mln teńge jinaldy. Úkimet qatty kómektesip, kedennen jyldam ótkizdi. Ottegi kontsentratorlary qysqa ýaqytta Qazaqstanǵa, sonyń ishinde elimizdiń túkpir-túkpirindegi aimaqtarǵa taratyldy. Sonymen qatar, Qyrǵyzstan, Ózbekstan, Tájikstan siiaqty baýyrlar memleketterge 20 kontsentratordan berdik», - deidi ol.
