Qyzylordalyq ýchaskelik politsei Baǵlan Amanjolov ishki ister organy salasynda bes jyldan beri qyzmet atqaryp keledi. Bala kezden tártip saqshysy bolýdy aldyna maqsat etken ol búginde óz kásibine úlken jaýapkershilikpen qaraidy. QazAqparat tilshisi Shieli aýdanyna qarasty Eńbekshi aýylynda qyzmet atqaratyn ýchaskelik politseidiń jumys kestesine zer salyp kórdi.
Baǵlan tań atqannan qyzmetine barýǵa qamdanady. Bul, kúndegi daǵdysyna ainalǵan. Tańǵy asyn ishkennen keiin qyzmet ornyna bet alady. Úiden shyǵar aldynda tátti uiqy qushaǵynda jatqan ulynyń mańdaiynan iiskeidi. Al jubaiy búgingi jumysyna sáttilik tilep, shyǵaryp salady.
Eńbekshi aýyly Qarataý qoinaýynda qonystanǵan. Eldegiler tórt túlik ósiredi. Tańǵy qarbalas tirshilik jergilikti halyqtyń kúndelikti ómir aýanyna ainalǵan. Kóshege shyqqan sátte Baǵlan olarmen amandyq-saýlyq surasady. Jas ta bolsa ol aýyldaǵy turǵyndarmen etene jumys jasaýǵa daǵdylanǵan. Úlkenderdiń aqyl-keńesine qulaq asýǵa tyrysady. Bul qoǵamdyq tynyshtyqty saqtaýǵa úlken áserin tigizedi. Aýyl qariialary tártip buzǵan tentekterin talqyǵa salyp, tyiyp ustaýǵa kóńil bóledi.
«Men politsiia qyzmetiniń qiyndyǵy men qyzyǵy qatar júretinin bala kezimnen bilemin. Bul mamandyqty tańdaǵanyma esh ókingen emespin. Eldiń tynyshtyǵy men amandyǵyn qaltqysyz qorǵaý - bizdiń azamattyq boryshymyz. Mektep qabyrǵasynda júrgende politsiia qyzmetkeri bolýdy aldyma maqsat etip qoidym. Olardyń qyzmetine qyzyǵa qaraityn edim. 2011 jyly mektep bitirip, B.Beisenov atyndaǵy Qaraǵandy akademiiasynyń tyńdaýshysy bolyp qabyldandym. 2015 jyly quqyq qorǵaý qyzmetinde joǵarǵy bilim alyp shyqtym. Oǵan qosa leitenant shenin aldym. Kóp uzamai Shieli aýdandyq ishki ister bólimine ýchaskelik politsiia inspektory qyzmetine keldim. Maǵan bul salada uzaq jyl eńbek etken aǵa býyn áriptesterim erekshe qoldaý kórsetti. Sol arqyly qyzmetimde mol tájiribe jinaqtadym», - dedi Baǵlan tilshimen áńgimesinde.
Ol politsiia qyzmetkeriniń boiynan qyraǵylyq pen tabandylyq, sypaiylyq, tózimdilik, qarapaiymdylyq, shapshańdyq syndy jaqsy qasietterdiń barlyǵy tabylý kerek dep sanaidy. Qandaida bir jaǵdaida jedel áreket jasap, tiisti sheshim qabyldaý qajet. Bul sátte qatelesýge eshbir jol joq.
«Ózim qarapaiym otbasynda, aýylda ata-ájeniń, ata-ananyń tárbiesin kórip óstim. Sondyqtan men úshin qazir ózim qyzmet atqaryp júrgen aýyl turǵyndarymen etene aralasý qiynǵa soqqan joq. Olarmen de jaqsy aralasyp turamyn. Burynnan tanys adamdar sekildimiz. Úlken-kishimen tyǵyz bailanystamyn. Baýyrjan Momyshuly «Tártipke bas igen qul bolmaidy, tártipsiz el bolmaidy» degen danalyqty aityp ketken. Bul sózdiń astarynda úlken maǵyna jatyr. Ádette, adamnyń ómirinde qiyndyq pen qýanysh qatar júredi emes pe? Kómek surap kelgen azamatqa barynsha jedel qyzmet kórsetýge kóńil bólemin. Olarǵa qol ushyn berip kómektesip, alǵysyn alyp jatamyz. Bul - biz úshin úlken abyroi», - dedi ol.
Baǵlan 2018 jyly otbasyn qurdy. Byltyr aýdandaǵy Eńbekshi aýyldyq okrýginde memlekettik qoldaý boiynsha jańadan salynǵan ýchaskelik politsiia inspektoryna arnalǵan qyzmettik úi men tirek pýkti paidalanýǵa berilgen bolatyn. 2019 jyly basshylyq tarapynan Baǵlanǵa sol aýyldyq okrýgte qyzmet atqarýǵa usynys túsken.
«Osylaisha Eńbekshi aýylyndaǵy qyzmettik jolym bastaldy. Jańa úi men ýchaskelik pýnkt bir ǵimaratta ornalasqan eken. Munda jumys isteý úshin barlyq jaǵdai jasalǵan. 2019 jyldyń qyrkúiek aiynda ulym dúniege keldi. Osylaisha jańa úi tabaldyryǵyn qýanyshta attadyq», - dedi Baǵlan.
Aýyldyq jerde mal urlyǵy qylmysy bolyp jatady. Qylmystyń aldyn alý – ýchaskelik politsiia inspektorynyń basty mindeti Alaida eldi mekenderde maldy kezektesip baǵý isine mán berilmei jatady.
«Jaiylymdyq jerde qaraýsyz júrgen mal urynyń basty nazaryna iligedi. Jeńil oljaǵa dánikken mal urysy kelesi joly sol qylmysty qaitalap jasaýy ábden múmkin. Osy oraida jergilikti turǵyndarmen maldy qaraýsyz qaldyrmaý maqsatynda túsinik jumystaryn júrgizemin. Osy oraida mal ielerine qatysty GPS qurylǵysyn ornatý, syrǵalaý, tańbalaý jaǵdaiyna nazar aýdaramyn. Bul óz jemisin berip otyr», - dedi Baǵlan óz oiyn bildirip.
Óziniń qyzmettik jolynda jemisti eńbek etip júrgen ýchaskelik politsiia qyzmetkeri Baǵlan Amanjolov osylaisha ýaqytpen sanaspai jumys jasap keledi. Sebebi, tártip saqshysy qoǵamdyq qaýipsizdikti saqtaý jolynda óz isine úlken jaýapkershilikpen qaraidy.
