Shý qalasynda eki turǵynnan 12,5 keliden astam «keptirilgen marihýana» tárkilendi, dep habarlaidy "Ult aqparat" Polisia.kz-ke silteme jasap.
22 tamyzda Jambyl oblysynyń Politsiia departamenti Esirtki qylmysyna qarsy is-qimyl basqarmasynyń qyzmetkerleri Ulttyq ulanynyń № 5517 áskeri bólimimen birlesip, Shý qalasynda VAZ-21015 markaly avtokólikti toqtatty. Kólikte 49 jáne 35 jastaǵy jergilikti turǵyndar bolǵan. «Chernysh» atty iisshil ittiń kómegimen avtokólikti tintý barysynda polietilen qapqa salynǵan, jalpy salmaǵy 12,5 keliden asatyn «keptirilgen marihýana» tabylyp, tárkilendi.
«Ustalǵandar kinásin moiyndap, Shý qalasynyń ýaqytsha ustaý izoliatoryna qamaldy. Qylmystyq kodekstiń 296-baby 4-bóligi (asa iri mólsherde esirtki quralyn zańsyz saqtaý) boiynsha sotqa deiingi tergeý amaldary bastaldy. Atalǵan qylmysty jasaǵany úshin úsh jyldan jeti jylǵa deiingi merzimge bas bostandyǵynan aiyrý jazasy qarastyrylǵan», – dedi Jambyl oblysynyń PD Esirtki qylmysyna qarsy is-qimyl basqarmasynyń bastyǵy Asqar Jumabekov.
