Shri-Lanka tarihynda eń úlken ekologiialyq apatty bastan keshirip jatyr. Eldegi tanymal kýrorttardyń jaǵajailary MV X-Press Pearl júk kemesindegi órt saldarynan mikroplastikke tolyp qaldy, dep habarlaidy Euronews.
Júk kemesi 25 tonna azot qyshqylyn, natrii gidroksidi men basqa da qaýipti himikattardy, sondai-aq plastik paketter jasaýǵa arnalǵan shikizat bar 28 konteinerdi tasymaldap bara jatqan. Mundai shikizat teńiz janýarlaryna qaýipti.
Jergilikti turǵyndarǵa qoqysty ustamaý kerektigin eskertti, óitkeni ol óte ýly bolýy múmkin. Oqiǵa ornynan 50 mil radiýsta balyq aýlaýǵa tyiym salyndy. Tazartý jumysyna qorǵanys quraldaryn kigen myńdaǵan áskeri qyzmetshi jumyldyryldy.
Singapýrda tirkelgen keme Úndistannyń Gýdjaratynan Kolomboǵa bara jatqan. Ol 20 mamyrda Shri-Lanka jaǵalaýynda órtenip ketip, qazir Kolombo astanasynan 9 mil qashyqta zákir tastap toqtady. Jalyndy tolyǵymen sóndirý múmkin bolmady. Órt sóndirýshilerdiń jumysyn mýsson jelderi kedergi keltirýde.
Keme kapitany men bas injeneri – reseilikter, al kapitannyń kómekshisi – úndistandyq. Úsheýinen de tergeýshiler jaýap aldy. Qazirgi málimet boiynsha, kapitan azot qyshqylynyń tógile bastaǵany týraly keme Shri-Lankanyń aýmaǵyndaǵy teńiz bóligine kirmei turyp bilgen. Bul órttiń shyǵýyna azottyń tógilýi sebep bolǵan dep boljanady.
Bilik konteiner tasymaldaýshy keme ieleri men onyń komandasyn sotqa berip, shyǵyndy óteýdi talap etpek.
