Aldaǵy bes jylda Ýkrainany shoýmen basqarýy múmkin. Prezident sailaýynyń birinshi týrynan soń Vladimir Zelenskii kandidattar arasynda kósh bastap keledi - 30,25 paiyz. Ázilkeshke berilgen daýys Ýkrainanyń qazirgi prezidenti Petr Poroshenkodan (16,54 paiyz) eki esege kóp. Osy oraida Tengrinews.kz agenttigi Ýkraina prezidenttigine basty úmitkermen tanystyrady.
Tájiribesiz saiasatker
Bolashaq ázilkesh-saiasatker Ýkrainada týǵanymen, bala kezinde otbasymen birge Mońǵoliiada tórt jyl turyp, mektep tabaldyryǵyn sol elde attaǵan. Ákesi tehnika ǵylymdarynyń doktory, professor bolsa, anasy injener qyzmetin atqarǵan.
Zelenskii mektep kezinde-aq saiasatqa jaqyn bolýdy armandap, diplomat mamandyǵyna oqymaq bolǵan. Biraq keiin oiy ózgerip, zańger bilimin alyp shyqty. Biraq ol zańger retinde eshqashan jumys istemegen. Saiasi tájiribesi de joq, biraq ázilkesh munyń utymdy tustaryn da taýyp aldy.
"Meniń zańgerlik bilimim bar, bul men úshin pliýs. Biraq saiasi tájiribem joq... Bul da úlken pliýs", - dep ázildeidi ol.
Negizi Vladimir Zelenskiidiń ómir jolyn anyqtap bergen - reseilik sahna. Ol 20 jasynda "95-i kvartal" komandasymen birge reseilik KVN-de oinaǵan. Biraq 2003 jyly KVN basshylyǵy men komanda arasynda janjal bolyp, "95-i kvartal" ýkrainalyq televiziiaǵa aýysady. Búginde bul komanda Ýkrainada reitingi eń joǵary shoýlardy uiymdastyratyn stýdiiaǵa ainalǵan.
Ázilkeshtiń 16 jyl buryn otasqan Elena esimdi jary bar. Jup Aleksandra esimdi qyz ben Kirill esimdi ul tárbielep otyr.
Zelenskii "Vechernii kvartal", "Boitsovskii klýb", "Rassmeshi komika", "Liga smeha" sekildi jobalarymen tanylǵan. 2015 jyly Zelenskii basty rólde oinaityn "Slýga naroda" serialy kórsetile bastady. Munda ol prezident sailaýynda jeńiske jetken tarih pániniń muǵalimin somdaidy. Zelenskii - bul serialdyń basty keiipkeri ǵana emes, ideia avtory ári prodiýseri. 2017 jyly álemdegi eń iri internet-TV platforma Netflix serialdy kórsetý quqyǵyn satyp alǵan.
Eýromaidan qoldaýshysy
Zelenskii óziniń saiasi kózqarasyn Ýkrainadaǵy maidan kezinde ashyq kórsete bastady. Mitingke shyqqandardy qoldap, olardyń aldynda óner kórsetken edi. Al Donetsk oblysynda bolǵan áskeri qaqtyǵys kezinde Zelenskii ýkrainalyq áskerge qoldaý kórsetip, olarǵa bir million griven bergen.
Ol óz ázilderinde Eýromaidan týraly jii aitady. Mysaly, "Berkýttyń" mitingke shyqqan stýdentterdi aiamai soqqyǵa jyqqany ýkrainalyqtar arasynda úlken janjal bolǵan edi. Buǵan qatysty Zelenskii jetekshilik etetin "95-i kvartal" ázildegen edi.
Ázilkesh Evgenii Koshevoi sol kezdegi el prezidenti Viktor Ianýkovichti somdap turǵan akterden "Berkýttikterge" ebonit taiaqshalaryn berip, al mitingke shyqqandar júnnen toqylǵan kiim kise, solardy urý arqyly elektr alýǵa bola ma?" dep suraidy.
Zelenskiidiń ózi mitingke shyqpai, nege sahnada ǵana osyndai ázilder aityp júrgenin túsindirdi. "Bizdiń platformamyz - bul "Vechernii kvartal". Mitingke shyqqandarǵa iýmormen qoldaý kórsetip, bilik, oppozitsiia týraly erkin ázildei alýymyz kerek", - degen bolatyn.
Sonymen qatar, Zelenskii Resei saiasatyna qarsy da jii ázil aitady. Sonyń saldarynan Reseide "Vechernii kvartal" shoýyn televiziiadan kórsetýge tyiym salynǵan. Biraq Ýkraina prezidentine úmitker óz suhbattarynyń birinde qajet bolsa, Pýtinniń aldynda tizerlep otyrýǵa da daiyn ekenin aitqan: "Qalasańyzdar, Pýtinge jalynyp, aldynda tizerleýge daiynmyn, biraq Ýkrainany tize búktirmeńizdershi".
Ýkraina prezidenttigine basty úmitker
Zelenskii óziniń prezidenttik sailaýǵa túsetinin resmi túrde 31 jeltoqsanda dál Jańa jyl qarsańynda aitqan. "1+1" telearnasy ártistiń resmi habarlamasyn kórsetý úshin sol kezdegi prezident Poroshenkonyń jańajyldyq quttyqtaýyn keiinge ysyryp tastaǵan.
Shoýmenniń prezidenttik sailaýǵa túsýin Ýkraina halqy ár túrli qabyldady. Biri "saiasattaǵy jańa tynys" dep sanasa, keibiri ýkrainalyq oligarh Igor Kolomoiskiidiń "qýyrshaǵy" dep oilaidy. Biraq Zelenskii oligarhpen tek iskerlik qarym-qatynasta ekenin aitady.
Shoýmenniń prezident sailaýyna túsiýine eldegi saiasi ahýal sebep bolǵan.
"Ár ýkrainalyqtyń basty maqsaty - adam ómirin saqtaý. Sondyqtan, birinshi qadam - oq atýdy toqtatý. Taraptarmen kelissóz júrgýimiz kerek. Ulybritaniia, AQSh-ty ózimizge tartýymyz qajet dep oilaimyn", - deidi Zelenskii.
Ázilkeshtiń aitýynsha, onyń prezident retindegi alǵashqy maqsaty - eldegi soǵysty toqtatý, ýaqytsha okkýpatsiialanǵan aimaqtardy qaitarý. Shoýmen prezident sailaýynyń alǵashqy týry 1 sáýirde aiaqtalatyny ózi úshin utymdy jait ekenin aitady: "1 sáýir - men úshin tamasha kún. Saiqymazaq úshin. Jeńiske jetý úshin. Men saiqymazaq emespin be?", - deidi ol.
Sońǵy málimetter boiynsha, Zelenskii birinshi týrdan soń 30,25 paiyz daýyspen kósh bastap keledi. Ekinshi oryndaǵy Petr Poroshenkoda - 16,54 paiyz. Endi eki kandidat úsh aptadan keiin sailaýdyń ekinshi týryna qatysady. Poroshenko óziniń basty qarsylasyn "Kolomoiskiidiń qýyrshaǵy" dep ataǵan edi.
Al Zelenskiidiń qazirgi prezident týraly pikiri mynadai: "Poroshenkony eki-aq sózben sipattap bere alamyn - "ókinishke qarai".
Eset Tólesh
