"Muzart" tobyndaǵy Kenjebek Janábilovke án satqan adam týyndyny taǵy on shaqty ónerpazǵa saýdalaǵan bolýy múmkin. Ózin aqyn jáne kompozitor dep tanystyrǵan azamatqa senip, uiatqa qala jazdaǵan juldyzdardyń arasynda Ashat Tarǵyn da bar. Ánshilerdiń kóbi shyǵarmalardyń arzan baǵasyna qyzyqqan. Sońynda ándi de, aqshany da ala almaǵan. Bul týraly "Ult aqparat" 31-arnanyń "Informbiýro" baǵdarlamasyna silteme jasap habarlaidy.
"Án alamyz" dep aldanǵandar quzyrly organdardan kómek surady. Ónerpazdardyń sózinshe, aqyn-kompozitordyń atyn jamylǵan azamattyń áreketinen bas-aiaǵy 100-ge jýyq adam zardap shekken. Kóbi 100 myńdap shyǵynǵa batsa, on shaqty ánshi bir ánge talasyp qalǵan kórinedi.
"Qysqasy shoý-bizneste alaiaq júr. Onyń esimi – Jaqsylyq Ybyrai. Bul maǵan satqan 3 ánniń avtorynyń bireýi de ózi emes ekenin túsindim. Óz avtorlary shyqty. Áigerim Syrlybaeva, Saiat Ábenovtyń ánderin maǵan satqan eken. Ol kisilerge aitsam, ol kisiler de ashýlandy. Olar "Buǵan deiin de bizdiń ánderimizdi satyp kelgen" deidi", – dedi ánshi, aktrisa Perizat Alpys.
"10-15 adamǵa satylǵan ba, sony bilmeimin naqty. Endi ondai ándi men de alyppyn. Taqyryby áielder, ideal, patsha men patshaiym jaily. Arzan bolǵannan keiin tegin kelip turǵan soń alasyń. Sózi de, mýzykasy da ádemi. Qarasam, ol ándi mundaǵylar kisiler shyǵaryp tastapty. Endi shyǵarsań uiat bolady. Elder eńbektenip qoidy, beinebaian túsirip tastapty", – deidi ánshi Áli Rimov.
"Ándi árleýimen, dombyra-gitara súiemeldeýimen qosyp jasap beremin dedi. Men tańǵaldym, biz degen 1 ándi 350-400 myńǵa jazamyz. Aqyndaryń bar ol jerde, oǵan 500 myń ketedi. Sóitip aityp edim, ol balasynyń aýyryp jatqanyn aitty. Aqshadan qysylyp jatyrmyn dedi. Sodan 80 myń teńgege aldym ándi. Ol erteń daiyndap jiberetin aityp, kelesi kúni joq boldy", – dep qosty ánshi Qanaǵat Mechenbai.
Al basy daýǵa qalǵan azamat ánshilerdiń ýájin joqqa shyǵaryp, olardyń aiybyn jalaǵa teńedi. Bir ánniń birneshe adamǵa satylǵanyna qatysy joǵyn aitty.
"Joq, endi meniń ánniń 10 adamǵa satylǵanyna qatysym joq. Kiná joq demeimin. Ol beker, jel turmasa shóptiń basy qimyldamaidy ǵoi. Menen de biraz qatelikter boldy negizi. 2-3 kúnde barlyǵyn rasymen retteimin. Men sizge keri bailanysqa shyǵamyn, olarǵa shyqpasam da. Boldy. Ózim habarlasamyn, qaita-qaita mazalaý qajet emes", – dedi Almaty qalasynyń turǵyny Jaqsylyq Ybyrai.
Ánshiler qolda tiisti aiǵaq baryn alǵa tartady. Olar politsiiaǵa aryz da qaldyrǵan.
"Bostandyq aýdanyna qarasty politsiia bóliminiń qyzmetkerleri tekserý jumystaryna kirisip ketti. Barlyq obektivti mán-jailar anyqtalyp, quqyqtyq turǵyda baǵa beriledi", – dedi Almaty qalasy politsiia departamentiniń resmi ókili Saltanat Ázirbek.
