Ishki ister ministrligi tergeý departamentiniń basshysy Sanjar Ádilov halyqty aldaǵan qarjy piramidalaryn jarnamalaǵan estrada jáne sport juldyzdarynyń áreketine qatysty túsinik berdi, dep habarlaidy "Ult aqparat".
«Jaqyn arada qarjy piramidalarynyń jarnamalyq qyzmetine qatysqan estrada juldyzdarynan jaýap alynady. Jalǵan aqparat taratý, qarjylyq piramidalardy jarnamalaǵany úshin zańnama boiynsha ákimshilik jaýapkershilik qarastyrylǵan, ony tergeý barysynda tekseremiz.
Shoý-biznes juldyzdary qylmystyq áreketterdi, qylmystyq uiymdardy jarnamalap otyrǵanyn naqty bilýi tiis. Bul uiymdar bizdiń azamattardyń aqshasyn jymqyrý úshin qurylǵan», - dedi S. Ádilov.
Eske sala ketsek, QR Ishki ister ministrligi qarjy piramidalary men lombardtarǵa aldanǵan qazaqstandyqtardan aryz-shaǵymdar áli de túsip jatqanyn málim etken bolatyn.
Salymshylardyń sanyn kóbeitý úshin kompaniialar Qazaqstan estradasynyń jáne sport salasynyń juldyzdaryn tartyp, aýqymdy jarnama júrgizgen.
«Búginge deiin 2 myńǵa tarta shaǵym tústi. Kompaniialardyń aimaqtardaǵy barlyq keńsesine tintý júrgizilip, birlesken jumys týraly kelisimder, býhgalterlik qujattar, noýtbýk, keńse tehnikasy, zergerlik buiymdar men ózge de zattar tárkilendi. Tárkilengen qujattarǵa sáikes kompaniialar 42 myń adammen kelisimge kelgen. Qazirgi esep boiynsha shyǵyn mólsheri 5 milliard 411 million teńge bolyp otyr», - delingen IIM habarlamasynda.
