Ekologiia, geologiia jáne tabiǵi resýrstar ministri Maǵzum Myrzaǵaliev Aqtóbe oblysyna sapary barysynda Alǵa aýdany Bestamaq aýylyndaǵy shoshqa fermasyna bardy. Aýyl belsendileri ferma jumysynyń qorshaǵan ortaǵa tigizip jatqan ziiany, ekologiialyq talaptardyń buzylýy týraly baiandady, dep habarlaidy "Ult aqparat" vedomstvonyń baspasóz qyzmetine silteme jasap.
Ministr Myrzaǵaliev pen Aqtóbe oblysynyń ákimi Ońdasyn Orazalin sharýashylyq mekemesine qatysty tekserý qorytyndylaryn jedeldetip, máseleniń zań aiasynda oryndy sheshilýine birlese yqpal jasaityndaryn jetkizdi.
«Biz jaǵdaidan habardarmyz, túsirgen barlyq videolaryńyzdy kórdik. Óńirlerde ne bolyp jatqanyn bilemiz. Máseleni zańdy túrde aiaǵyna deiin jetkizý kerek. Biz tekserý protsesterin jedeldetýge atsalysamyz»,- dedi ministr.
Jergilikti halyq máseleniń sheshilýine óz taraptarynan barynsha kómek kórsetýge daiyn ekenderin aitty.
«Jerlesterimizdiń talap-tilekteri oryndy. Osy másele kóterilgen kúnnen bastap, aýyl turǵyndary sabyrlyq tanytyp, túsinistikpen qarap keledi. Shoshqa fermasy baǵytyn ózgertýi kerek nemese jumysyn toqtatýy qajet. Degenmen, bul bir kúnniń sharýasy emes, qazir quzyrly mekemeler tarapynan qajetti sharalar qabyldanyp, jumys júrip jatyr», - dep aitty óńir basshysy Ońdasyn Orazalin.
Eske salsaq, 2020 jyly qarasha aiynda Bestamaq aýylynyń turǵyndary shoshqa fermasyn jabýdy talap etken bolatyn. Jospardan tys tekserý nátijesinde las zattar shyǵaryndylarynyń shamadan tys kólemi men qaldyqtary kómý, óndiristik sýdy ruqsatsyz tógý faktileri úshin fermaǵa 7 mlrd teńgege jýyq aiyppul salyndy. Qazirgi ýaqytta sot protsesteri jalǵasyp jatyr.
