Aqmola oblysynyń Shortandy kentinde gaz ballony jarylyp, 3 adam kóz jumdy, taǵy on adam aýrýhanaǵa tústi, dep habarlaidy QazAqparat.
Oqys oqiǵa túngi saǵat 22:00 shamasynda Shortandy kentinde Lineinaia kóshesi 28 meken-jaiy boiynsha ornalasqan úsh páterli turǵyn úide boldy. Gaz ballonynyń jarylýy saldarynan 3 páterli jeke úi órtenip, onyń bir bóligi qulady.
Qazirgi málimet boiynsha, úiindiniń astynan úsh adamnyń denesi tabyldy, onyń bireýi kámelettik jasqa tolmaǵan bala. Sonymen birge, túrli deńgeidegi dene kúiigimen 10 adam aýrýhanaǵa jatqyzyldy, onyń ishinde balalar bar. Keibir zardap shekkenderdiń jaǵdaiy aýyr.
TJM resmi ókili Talǵat Ýálidiń málimdeýinshe, Shortandy kentiniń №18 bailanys pýnktine politsiia bóliminiń kezekshisinen gaz ballonnyń jarylǵandyǵy týraly habarlama keshe saǵat 21:38-de kelip túsken.
Órtti sóndirýge TJD-nyń 35 qyzmetkeri men 7 tehnikasy, «Jer Ana» JShS MEÓQQ-nyń 4 qyzmetkeri men 1 tehnikasy jumyldyrylǵan.
«Baraq úlgisindegi páterde órt shyǵyp, shatyryn tolyqtai jalyn sharpyǵan. Órttiń aýmaǵy shamamen 350 sharshy metrdi sharpyǵan. Órt saǵat 22:35-te aýyzdyqtalyp, saǵat 23:55-te tolyq sóndirildi. Oqiǵanyń mán-jaiy men sebepterin anyqtaý úshin Aqmola oblystyq tergeý-jedel toby jáne zertteý-órt zerthanasy jumys isteýde», delingen habarlamada.
Kýágerlerdiń aitýynsha, oqiǵa ornyna jergilikti 80-ge jýyq turǵyn kómekke kelgen.
Sonymen qatar, Shortandy aýdandyq aýrýhanasyna Nur-Sultan qalasyndaǵy kópbeiindi oblystyq aýrýhanadan reanimatologtar men hirýrgtar keldi, sondai-aq Kókshetaý qalasynan balalar reanimatologtary men hirýrgtary quramy bar sanaviatsiianyń kelýi kútilýde. Oqiǵa ornyna shuǵyl túrde Aqmola oblysy Densaýlyq saqtaý basqarmasynyń basshysy Nariman Syzdyqov shyqty.
«Qazirgi ýaqytta zardap shekken 11 adam, onyń ishinde bes eresek adam jáne alty bala bar. Zardap shekken on adam aýrýhanaǵa jatqyzyldy. Jaǵdai óte kúrdeli. Qazirdiń ózinde sanitarlyq aviatsiia boiynsha hirýrgter, sonyń ishinde balalar hirýrgtary jiberildi. Qaza bolǵandardyń sany artýy múmkin», - dep túsindirdi aimaqtyń bas dárigeri.
