QR TJM Azamattyq qorǵanys jáne áskeri bólimder komitetiniń tóraǵasy Baýyrjan Syzdyqov eldegi shomylý maýsymyna daiyndyq jumystaryn baiandady, dep habarlaidy QazAqparat.
Qazirgi tańda elimizde shomylýǵa ruqsat berilgen 469 oryn bar, onyń ishinde 118 kommýnaldyq jáne 275 jeke jaǵajai belgilengen. Shomylý maýsymy 1 maýsymda resmi bastalady.
«Qazaqstanda 50 myńnan astam sý aidyny bar, TJM qutqarý bólimsheleri adam kóp jinalatyn sý aidyndarynyń 125 ýchaskesin baqylaidy, onda kún saiyn 493 qutqarýshy kúndelikti qyzmet atqarady.Biyl sý akvatoriialaryn qamtýdy ulǵaitý jáne azamattardyń qaýipsizdigin qamtamasyz etý úshin qaýipti jáne kúzetilmeitin sý aidyndarynda qosymsha 48 kóshpeli qutqarý beketi qoiylady», - dedi Baýyrjan Syzdyqov Ortalyq kommýnikatsiialar qyzmetinde ótken brifingide.
Odan bólek, ákimdikter jáne sý mańyndaǵy demalys oryndarynyń ieleri birlesip, TJM jedel-qutqarý jasaqtarynda daiarlyqtan ótken 250 qutqarýshyny tarta otyryp, 108 nysandyq qutqarý beketin qurdy. Sýda zardap shekkenderge alǵashqy meditsinalyq kómek kórsetý úshin óńirlerde 97 meditsinalyq pýnkt daiyndaldy.
«Qalalyq jaǵajailarda sýǵa túsýge arnalǵan qaýipsiz balalar jaǵajaiy jabdyqtalatyn oryn ashylady, ol jerde bizdiń qutqarýshylar balalardy júzýge úiretedi.
Sý aidyndarynda qaiǵyly oqiǵalardyń aldyn alý úshin 2,5 myńnan astam eskertý belgisi ornatylǵan, halyq arasynda 70 myńnan astam úgit-nasihat taratylǵan. Elimizdiń barlyq óńirlerindegi shomylýǵa tyiym salynǵan jáne ruqsat etilgen oryndardy 2GIS kartografiialyq platformasyna ornalastyrý úshin aviatsiialyq jáne temirjol kóliginiń múmkindikterin paidalaný máseleleri pysyqtalýda», - deidi B. Syzdyqov.
