Elimizde 435 myń oqýshyǵa kompiýter berildi. Bul týraly QR Bilim jáne ǵylym vitse-ministri Sholpan Karinova aitty, dep habarlaidy QazAqparat.
«Búgingi aqparatqa toqtalar bolsaq, oqý jylynyń 9-shy kúni ótip jatyr. Birinshi kúnniń ishinde 2 millionnan astam sabaq berilgenin kórip otyrmyz. Árine, qashyqtan oqytý boiynsha da, shtattyq rejimde sabaq berý boiynsha da birqatar jumys jasaldy. Kompiýter qajet etetin barlyq oqýshylardy tehnikamen jabdyqtaý jumystary júrgizildi. Búgingi kúni 435 myń oqýshyǵa kompiýter berildi. Bul, qashyqtan oqytýdy uiymdastyrý úshin jasaldy», - dedi vitse-ministr búgin Ortalyq kommýnikatsiialar qyzmetindegi baspasóz máslihatynda.
Ol Bilim jáne ǵylym ministrligi qashyqtan oqytý kezindegi problemalardyń da bar ekendigin biletindigin aitty.
«Bilim ministrligi bul másele boiynsha kúndelikti bilim mekemelerimen, bilim basqarmalarymen jumys istep jatyr. Onyń ishinde áleýmettik jelide ata-analardyń, muǵalimderdiń depýtattardyń kóterip otyrǵan máselelerin baiqap, kórip otyrmyz. Olardyń árqaisysyna jeke jaýap berip, sheshý máselesimen ainalysýdamyz. Áleýmettik jelilerde kei sabaqtar sátti ótpegeni týraly da habarlardy estidik. Bul máselege qatysty taldaý jumystary júrgizildi. Ótkizilgen 2 mln sabaqtyń ishinde Zoom bailanysymen ótken 2 sabaqqa bógde adamdardyń aralasyp, keleńsizdik oryn alǵandyǵyn bilemiz. Osyǵan orai, barlyq mektepterge, muǵalimderge taǵy da túsindirý jumystary júrgizildi», - dedi Sholpan Karinova.
Onyń aitýynsha, 350 myńǵa jýyq muǵalimge IT-quzyrettilikti úiretýge baǵyttalǵan kýrstar uiymdastyrylǵan.
«Biraq, búgingi kúni osyndai keleńsiz jaittar oryn aldy. Taǵy da túsindirý jumystaryn júrgizip, mundai jaittyń aldaǵy ýaqytta oryn almaýyn qadaǵalaimyz. Sonymen qatar osy másele boiynsha ata-analardyń da balalarmen túsindirý jumystaryn júrgizýdi ótinemiz», - dedi vitse-ministr.
