"Jaralanǵan júrekter", "Aiman-Sholpan", "Anashym, meni qaldyrma", "Shabdaly" filmderine túsken teatr jáne kino aktrisasy Sholpan Elgezekova jańa jyl qarsańynda jantúrshigerlik apattan kóz jumdy. Elgezekovanyń áriptesteri marqumnyń týystary men jaqyndaryna qaiǵyra kóńil aityp, estelikterimen bólisti, dep jazady Sputnik.
Akademiiada oqyp júrgende júrgende "Sahna tili" páninen sabaq bergen ustazy Orazhan Kenebaevtyń aitýynsha, Sholpan Elgezekovanyń boiyndaǵy kishipeiildilik qasieti bala kezdegiden de arta túsken. Otandyq "Aiman-Sholpan" serialynda bir túsirilim tobynda jumys istegen ustaz ben shákirt birneshe jyldan keiin kezdesken. Akterdiń aitýynsha, ortasyna syily bolǵan stýdent Sholpan óz jumysyna da asqan uqyptylyqpen qaraityn talantty aktrisaǵa ainalǵan.
"Sholpan akademiiada oqyp júrgende "Sahna tili" páninen menen sabaq alǵan. Tártipti, uqypty bala bolatyn. Úlkendi úlkendei, kishini kishidei syilai biletin, ózin syilata biletin ortasyna syily adam edi. Sodan keiin men ony kóp ýaqyt kórgen joqpyn. Joǵaltyp aldym. Sóitsem Astanada bolǵan eken. Keiinnen "Aiman-Sholpan" serialynda kezdestik. Qyzymyzdy kórgenime qýanyshty boldym. Sholpan – jumysyna at ústi qaramaityn, ózi somdaityn róldi tolyqtai zerttegen, úlken bilimmen kelgen aktrisa. Úlkeie kele kishipeiildiligi artqan eken. Eshkimniń aldynan ótpeidi. Árdaiym aǵalap turatyn", — deidi Orazhan Kenebaev.
"Shabdalynyń" kastinginen súrinbei ótti
"Sholpanmen 2011 jyly "Jastyǵym meniń — Astana" degen shaǵyn televiziialyq filmniń túsiriliminde tanystyq.
Keiin men o kisini múldem umytyp ketippin. Araǵa jeti jyl salyp, "Shabdalynyń" kastinginde kezdestik. Bas keiipkerdiń anasynyń róline birneshe úmitker boldy. Bári jaqsy, birinen biri ótken, biri teatrdyń sahnasynda shyńdalǵan, biri kinodaǵy praktikaǵa bai aktrisalar kelip jatty.
Biraq maǵan birdeńe jetpei turdy. Grafik boiynsha túsirilim erteń. Men bas keiipkerlerdi udaiy aptalap, keide ailap izdeimin", — deidi "Shabdaly" filminiń qoiýshy rejisseri Jandos Qusaiyn.
Rejisserdiń aitýynsha, ol túsirilimniń aldynda keshki saǵat jetige deiin sońǵy úmitkerge deiin kútken. Al sońǵy úmitker bolyp Sholpan Elgezekova mezgildiń qys bolǵanyna qaramastan shashyn túiip, kózine kúnnen qorǵaityn kózildirik kiip kirip kelgen kórinedi.
"Erkin sóileidi. Kire kasting atqarýshy qyzdardy qaǵytyp qoiady. Ózin on segizdegi boijetken sezinedi. Stsenarii boiynsha, bizge kerek aktrisa — bas keiipkerdiń anasy. Ana kerek bizge. Al myna kisiniń ózi qyz sekildi… Túrine qarap em, shyramyttym. Kameranyń aldyna kelip turdy. Monitordan qaradym. Kelbeti kelisti, túri súikimdi, qylyǵy tartymdy. Ózine jarasatyn erkeligi de bar. Stsenariiden bir sahna berdik. Túrlenip sala berdi. Baǵanaǵy qyz qylyq jaiyna qaldy. Ashýlanatyn jerde shatynady, jylaityn jerde áp-sátte kózine jaz aldy. Muńaia salady da, kenet janary jarq etip kúledi. Ishim jylyp sala berdi. "Sholpan, bylai aityńyz" deimin — aina-qatesiz oryndaidy. "Endi bylai deńiz" deimin. Tap-tuinaqtai tehnika. Sezimge bai. Ishi bos emes. Komandamen aqyldasyp, ainalasy bir saǵatta "Shabdalynyń" bas róline bekitilip kete bardy", — dep eske aldy rejisser.
Alaida, túsirilimniń birinshi kúninde Sholpan Elgezekova mátinnen jańyla bergen. "Stsenarii boiynsha qostanailyq áiel, qazaqshasynan góri orysshasy júirik bolýy kerek edi", — deidi rejisser. Sol sátte Jandos Qusaiyn óziniń tańdaýda jańylǵanyn aityp, aktrisany aýystyrý kerek ekenin aitqan. Alaida ýaqyt pen energiiany shyǵyndaǵan túsirilim toby taǵy bir kún synap kórýdi usynǵan. Túsirilimniń ekinshi kúninen bastap aktrisa obrazyna kirip, róldi túrlendire túsken.
"Sholpan óz obrazyna kóp element qosty, túrlendirdi, tolyqtyrdy. Túsirilim barysynda únemi izdenip, "ol myna sózdi bylai aitady, myna áreketti bylai isteidi" dep júretin. Jumysyna júrdim-bardym qaramaidy. Túski asta qatar otyramyz. Meni suraqtarmen mezi etedi. "Myna jerde nege óitedi á? Ol nege bylai sóileidi, nege bylai isteidi". "Sholpan, bul jalǵanda "Shabdalydan" da basqa qyzyqtar bar, mysaly, myna palaýdy, ánebir salatty áńgime qylaiyqshy" dep kúletinmin. Ol bolsa keiipkerin talqylaýdan talmaityn. Azdap qiialilaý da edi", — deidi rejisser.
"Júreginiń náziktigi aitqan áńgimelerinen bilinedi"
"Shabdaly" filminde Sholpan Elgezekovaniń qyzynyń rólin somdaǵan Aidana Qyzylkulova aktrisany árdaiym kúlimdep júretin, kózderiniń jalynynan ómirge degen mahabbaty kórinetin dep eske aldy.
"Men "Shabdaly" filmniń túsirilimine kelgende, semka bastalyp ketken bolatyn. Sholpan táteni alǵash kórgende: "O, docha, qalaisyń? Uzaq kútip qaldyq qoi seni", — dep qarsy alǵan.
Bul kisi árdaiym kúlimdep júretin, kózderiniń jalynynan ómirge degen mahabbaty kórinetin. Biler-bilmesimdi aityp, keńes berip turatyn. Túsirilim kezinen tys habarlasyp, "osyndai joba bolǵaly jatyr, soǵan bar, kór" dep baǵyttaityn meni. Sholpan táteniń júreginiń náziktigi aitqan áńgimelerinen baiqalady.
Túsirilimniń sońǵy kúnderinde, aramyzda "ana men qyz" týraly sóz qozǵalǵan bolatyn. Túiindep, maǵan "Eger sende sondai tańdaý bolsa, mahabbat pa, álde karera ma, sen neni tańdaýshy ediń?" degende, suraqqa suraq qaitaryp, "Al, siz she? Qyzyńyzǵa qandai aqyl aitar edińiz?" degende, ol maǵan "Eger qazirgi kezde adamnyń shynaiy bolmysy, shynaiy qarym-qatynasy birden kórinetin bolsa ǵoi, men ózim jetektep aparyp berýshi edim jáne sen meni osylai qinamaýshy ediń" dep kúlimdegen bolatyn", — dep qaiǵyra eske aldy Aidana Qyzylkulova.
"Jospary kóp edi"
Teatr jáne kino aktery Dýlyǵa Aqmoldanyń aitýynsha, Sholpan Elgezekova Qazaqstanda qýyrshaq teatryn qolǵa alýdy josparlap júrgenin aitty.
"Shamamen bir ai buryn rejisser Arman Qarabaevtyń jańa jobasynda Sholpan Elgezekovamen tanysyp, birinshi ret kinoda sahnalas boldyq. Qaitys boldy degen kezde, jeliden sýretin kórgen kezde ózimde tolqý boldy. Keshe ǵana birge jumys istep, syrlas bolǵan adamnyń dúnieden ótkenin estý kóńilimizge qaiǵy ornatty. Óte talantty aktrisa edi. Qýyrshaq teatry Qazaqstanda kenjelep keledi, sony damytqym keledi dep óziniń josparlaryn aityp edi", — dedi Aqmolda.
29 jeltoqsanda Almatyda Abai men Seifýllin kóshesindegi jantúrshigerlik jol apatynan úsh adam qaitys boldy. Arasynda teatr jáne kino aktrisasy Sholpan Elgezekova bar.
