Foto: Halyq Uni
Qazaqstannyń bas áskeri prokýrory Dastan Sekenov Shóldaladaǵy sarbazdyń ólimi boiynsha sot úkimine narazylyq bildiretinin málimdedi, habarlaidy Sputnik Qazaqstan.
24 tamyzda Shymkent garnizonynyń áskeri sotynda Jambyl oblysynyń "Shóldala" shekara zastavasyndaǵy bólimshe komandiri Aibek Nurtaevqa úkim shyǵaryldy. Ol Qylmystyq kodekstiń tórt babymen aiyptaldy, biraq eń aýyr eki bap – ózin-ózi óltirýge deiin jetkizý jáne aýyr zardaptarǵa ákep soqtyrǵan bilikti asyra paidalaný boiynsha aqtaldy.
Onyń advokaty Pirálievtiń aitýynsha, kelisimshartpen qyzmet atqarǵan komandir "bopsalaý", sondai-aq eki sarbazdy basynan urǵany úshin bilikti nemese qyzmettik ókilettikterdi asyra paidalaný boiynsha kináli dep tanylǵan.
"Meniń qorǵalýshym 3,5 jylǵa bas bostandyǵynan aiyryldy. Biraq bir jyl buryn qamaýǵa alynǵanyn eskerý kerek. Bul ýaqyt jaza merziminde bir jarym kún retinde esepteledi. Iaǵni, qazirgi ýaqytta ol bir jarym jyl jazasyn ótegen dep esepteledi. Úkimge biz shaǵymdanamyz, biraq ol zańdy kúshine ense de, ol bes aidan keiin shartty jaza boiynsha shyǵady", - dedi advokat Piráliev Sputnik Qazaqstan tilshisine bergen suhbatynda.
Al Qazaqstannyń bas áskeri prokýratýrasy sot úkimimen kelispeidi. Qadaǵalaýshy organ komandir sarbazdy óz-ózin óltirýge deiin jetkizdi dep sanaidy jáne osy bap boiynsha sottaýdy talap etip otyr.
"Úkim shyǵarylǵan kezde sarbazdyń óz-ózine qol salýyna qatysty is bólek óndiriske shyǵaryldy da, bizge jiberildi. Biz qazir ol úkimge narazylyq keltiremiz, ol zańdy kúshine engennen keiin taǵy qaraimyz. Bizdiń oiymyzsha, kelisimshart boiynsha qyzmet atqarǵan áskeri qyzmetshi jasaǵan áreketiniń nátijesinde Mirash óz-ózine qol saldy", - dedi bas áskeri prokýror Dastan Sekenov búgin jýrnalisterge bergen suhbatynda.
Komandirdiń kinási dáleldense, ony ózin-ózi óltirýge deiin jetkizý baby boiynsha sottaidy. Jaza kúsheitiledi.
Bekbol Mirashtyń ólimi
2022 jyldyń tamyzynda Jambyl oblysyndaǵy "Shóldala" shekara zastavasynda 18 jastaǵy sarbaz Bekbol Mirash sýitsid jasady.
Bastapqyda sarbazdyń otbasyna onyń súiiktisimen urysqany týraly habarlanǵan. Alaida soldat qyzǵa jazǵan habarlamalarynda qorqyp júrgenin aitqany anyqtaldy. Marqum sarbaz ben qyzynyń arasynda janjal bolmaǵan.
Sodan keiin onyń ólimine sol zastavanyń bólimshe komandiri kúdikti retinde tanylyp, aýyr zardaptarǵa ákep soqtyrǵan bilikti asyra paidalandy degen aiyp taǵyldy.
Aiyptalýshynyń advokaty Serjan Piráliev BAQ aldynda sóz sóilep, tergeý nátijesimen kelispeitinin, tergeýde zań buzylǵanyn aityp dabyl qaqty.
Onyń aitýynsha, sot-meditsinalyq saraptama qaza tapqan merzimdi sarbazdyń ish kiimi men aýzynan spermatozoid tabylǵanyn anyqtaǵan. Tergeý barysynda tergeýshi áskeri qyzmetshige qatysty jynystyq zorlyq-zombylyq nusqasyn qaraýdan bas tartty.
