© Photo: Pixabay / Gerd Altmann
Ulttyq qaýipsizdik komiteti tóraǵasynyń orynbasary - shekara qyzmetiniń direktory Erlan Aldajumanov Jambyldaǵy sarbazdyń ólimi boiynsha advokat Pirálievtiń málimdemesine qatysty pikir bildirdi, dep habarlaidy Sputnik Qazaqstan portaly.
Buǵan deiin osy is boiynsha zastava komandiri kúdikti dep tanylǵan. Onyń advokaty Serjan Piráliev tergeý sharalarymen kelispei, marqumnyń aiaqkiiminde jáne aýzynda ózge adamdardyń biomaterialy anyqtalǵanyn málimdegen bolatyn. Onyń aitýynsha, qorǵap jatqan kúdiktiniń DNQ-sy tabylmaǵan.
Ishki ister ministrligi advokatty etikany buzǵany úshin aiyptady. Al áskeri prokýratýra Jambyl oblysyndaǵy "Shóldala" shekara zastavasynda bolǵan sarbazdyń sýitsidi boiynsha tergeýdi qaita bastaýǵa sheshim qabyldady.
Shekara qyzmetiniń bastyǵy Erlan Aldajumanov tergeýdiń aiaqtalǵanyn kútý kerek deidi. Biraq óz oiyn aitty.
"Advokattyń dálelderi boiynsha tuspal jasamai-aq qoiaiyn. Bir ǵana nárse aitaiyn, ol kisi - basty kúdiktiniń advokaty. Ony túsinip tursyz ba? Ol kúdiktini qorǵaýdyń sondai formasyna bardy, bul - ony jeke isi. Tergeý aiaqtalady. Sol kezde kim kináli jáne kimdiki durys ekenin kóremiz. Tergeýdiń nátijesin kúte turaiyq. Mine, az-aq qaldy", - dedi Aldajumanov senatta ótken brifingte.
Aita keteri, byltyr tamyz aiynda Jambyl oblysynyń shekarasynda áskeri boryshyn ótegen 18 jastaǵy Bekbol Mirash at qoradan óli tabyldy. Osydan keiin bólim komandiri qamaýǵa alynyp, oǵan qatysty "aýyr zardaptarǵa ákep soqtyrǵan bilikti asyra paidalaný" baby boiynsha sotqa deiingi tergeý bastaldy.
