Jetisý oblysy Sholaqai aýylynda qyz zorlap, óltirdi degen kúdikpen ustalǵan er adam osyndai qylmysy úshin buryn da jazasyn ótegen, biraq himiialyq kastratsiiadan ótpegen. Bul týraly IIM Qylmystyq-atqarý júiesi komiteti ókili Tengrinews.kz tilshisi joldaǵan resmi saýalǵa jaýap retinde aitty.
Qazaqstanda zorlaý deregine qatysty qatań jaza qarastyrylǵan. 15 jastaǵy qyzdy zorlap, óltirdi degen kúdikpen ustalǵan 38 jastaǵy er adam buryn da sottalǵan, biraq shartty túrde merziminen buryn bosatylyp, himiialyq kastratsiiadan qutylǵan.
Komitet málimetinshe, er adam 2013 jyly Qylmystyq kodekstiń 120-baby 2-bóligi "Zorlaý..." boiynsha sottalǵan. Qylmystyq kodekste birneshe tarmaq bar, alaida oqiǵa burynyraq bolǵanyna bailanysty er adam naqty qai tarmaq boiynsha qylmys jasaǵany belgisiz.
Qylmystyq kodekstegi barlyq tarmaq:
1) adamdar toby, aldyn ala sóz bailasý arqyly adamdar toby jasaǵan;
2) óltirý qaterin tóndirýmen ulasqan, sondai-aq, jábirlenýshige nemese basqa da adamdarǵa qatysty asa qatygezdikpen jasalǵan;
3) jábirlenýshige soz aýrýyn juqtyrýǵa alyp kelgen;
4) birneshe ret jasalǵan;
5) adam qyzmettik mindetterin oryndaý kezinde jasaǵan zorlaý.
Qylmystyq kodekske sáikes, 2-bólik boiynsha kúdikti 9 jyldan 12 jylǵa deiin bas bostandyǵynan aiyrý qarastyrylǵan.
Er adam 5 jylǵa sottalǵan. Sonymen qatar, 2015 jyly Taldyqorǵan sotynyń qaýlysyna sáikes bas bostandyǵynan aiyrý túrindegi jazanyń ótelmegen bóligi bas bostandyǵyn shekteýge aýystyrylǵan.
"Shartty túrde merziminen buryn bosatýdy alyp tastaý 2016 jylǵy sáýirinen bastap kúshine endi", - dep túsindirdi QAJK ókili.
Er adam tolyq merzimde jazasyn ótese, ol 2018 jyly bosar edi. Demek, ol 2015 jyly bosatylmasa, jazadan shartty túrde merziminen buryn bosatý arqyly shyǵa almaityn edi.
"Dál sol qylmysy úshin adamǵa himiialyq kastratsiia qoldaný máseleleri boiynsha ózgertýler men tolyqtyrýlar 2018 jylǵy 1 qańtardan bastap kúshine endi. Sondyqtan oǵan bul shara qoldanylǵan joq", - dep naqtylady QAJK qyzmetkeri.
Aita keteiik, himiialyq kastratsiia kámeletke tolmaǵandarǵa jynystyq zorlyq-zombylyq kórsetkeni úshin júrgiziledi. Bapqa sáikes, kúdikti kámeletke tolǵan qyzdy zorlaǵany úshin birinshi ret jazasyn ótegendikten, oǵan kastratsiia qoldanylmaǵan.
Eske salaiyq, buǵan deiin Jetisý oblysynda 15 jastaǵy oqýshy qyzdy zorlap, óltirdi degen kúdikti ustalǵany habarlanǵan bolatyn. Ol qylmysyn moiyndaǵan.
Politsiia málimetinshe, er adam qyzdy zorlap, keiin óltirip, sodan keiin qylmystyń izin jasyrý úshin denesin órteýge tyrysqan. Endi kúdikti ómir boiy bas bostandyǵynan aiyrylýy múmkin.
