QR Densaýlyq saqtaý ministri Eljan Birtanov fast-fýdty shekteýge qatysty pikir bildirdi, dep xabarlaidy QazAqparat tilshisi.
«Árine, densaýlyqqa ziiandy ónimderdi shekteýge qatysty aldymen memleket tarapynan tiisti sharalar qolǵa alynýy qajet. Osyǵan bailanysty Densaýlyq saqtaý ministrligi mektepterge arnalǵan sanitarlyq erejelerdi shyǵardy. Biz mektepterde gazdalǵan tátti sýsyndardy satýǵa tyiym saldyq. Sosyn konditerlik ónimderdi satýǵa bolmaidy. Sondyqtan osyny qoǵam bolyp baqylaý qajet. Ata-analarǵa aitarym, mektepterde shokolad, kola men tátti sýsyndardy satsa, birden qoǵamdyq densaýlyqty saqtaý departamentine xabar berińizder. Olar bárin tekserip, tiisti sharalardy qolǵa alady», - dedi E.Birtanov xalyq aldynda esep berý kezdesýi kezinde.
Ministrdiń aitýynsha, adam densaýlyǵyna ziiandy ónimderdiń saýdasyna tyiym salý qiyn. Oǵan qosa, atalǵan kompaniialar óz taýarlaryn jan-jaqty jarnamalap otyrady.
«Degenmen, qoǵamdyq densaýlyqty damytýdyń keshendi jospary aiasynda naqty talaptar bar. Atalǵan standarttardyń barlyǵy mektepterge taratyldy. Sol boiynsha balalardy tamaqtandyrýdy júrgizedi. Al úide biz ózimiz balalardy durys ári paidaly tamaqty tańdaýǵa úiretýimiz kerek. Menińshe, bul - basty másele. Biz ózimiz ata-ana bolyp, balalarǵa úlgi kórsetpesek, salaýatty tamaqtaný mádenietin qalyptastyra almaimyz. Negizi, fast-fýd bizdiń xalqymyzǵa da, mádenietimizge de jat nárse. Ony almastyratyn taǵamdarymyz kóp», - dep atap kórsetti E.Birtanov.
