Biyl Qazaqstan 30 myń tonna siyr etin eksportqa shyǵarýdy josparlap otyr. Bul týraly búgin Úkimettiń selektorlyq rejimdegi otyrysynda QR Premer-Ministriniń orynbasary - Aýyl sharýashylyǵy ministri Ómirzaq Shókeev aitty, dep habarlaidy "QazAqparat".
"Memleket basshysy 2019 jylǵy 30 qańtarda ótken keńeitilgen otyrysta sala aldyna birqatar mindetter qoidy. Et eksportyn arttyrý boiynsha, ózderińiz bilesizder, ótken jyly 19 myń tonna siyr eti eksporttaldy. Biylǵy jylǵy meje 30 myń tonna siyr etin eksporttaý josparlanyp otyr", - dedi ministr.
Onyń aitýynsha, berilgen tapsyrmany oryndaý úshin etti mal sharýashylyǵyn damytý baǵdarlamasyn iske asyrý jalǵasatyn bolady. Iri qara maldy tuqymdyq túrlendirý júrgiziledi.
"Biyl 1,2 mln bas iri qara mal tuqymdyq túrlendirýge qatysýy tiis. Bordaqylaý alańdaryna 353,6 myń bas buqashyq jetkizý kerek jáne 100 myń bas iri qara mal, 415 myń bas usaq mal satyp alý kerek. Ol úshin qajetti kredittik resýrstar qarastyrylǵan", - dedi Ó.Shókeev.
