Túrkistan oblysynyń ákimi Ómirzaq Shókeev Saryaǵash aýdany ákiminiń esebine eskertýsiz bardy, dep habarlaidy "Ult aqparat" oblys ákiminiń baspasóz qyzmetine silteme jasap.
Túrkistan oblysynyń ákimi Ómirzaq Shókeev aýdan-qala ákimderiniń jyldyq esebine eskertýsiz kelip qatysatynyn eskertken bolatyn. Aimaq basshysy Saryaǵash aýdany ákiminiń eseptik jiynyna eskertýsiz kelip, qatysty. Óńir basshysy kelgende aýdan ákimi Muhit Otarshiev jergilikti halyqtyń saýaldaryna jaýap berip jatqan. Kútpegen kezdesýge kýá bolǵan turǵyndardyń keibiri usynys-pikirlerin Ómirzaq Shókeevtiń ózine ákelip tapsyrdy. Aýdanda atqarylǵan jumystardy baiandaǵan aýdan basshysy áleýmettik-ekonomikalyq damý jaǵynan jaqsy kórsetkishterge qol jetkizilip, barlyq salada ósý baiqalatynyn atap ótti.
«Ásirese aýyl sharýashylyǵy men týrizm, qurylys salalalarynda josparlanǵan jumystar qarqyndy júrgizilýde. 2020 jyly 30 áleýmettik nysannyń qurylysyn júrgizý josparlanyp, biýdjettiń kiris bóligi 102,7%-ǵa oryndalǵan. Aýyl sharýashylyǵy óniminiń kólemin 2020 jyly 80 mlrd teńgege jetkizý josparlanýda. Aýdandaǵy shaǵyn nesie uiymdary tarapynan barlyǵy 5057 adamǵa 4,7 mlrd teńge kóleminde nesieler berilip, nátijesinde 6340 jumys orny ashylǵan. 2019 jyly aýdanǵa 38,8 mlrd teńgeniń investitsiiasy tartylǵan», - dedi halyqqa esep bergen Muhit Otarshiev.
Aýdan ákiminiń sózinshe, «Halyq únine qulaq asatyn memleket» tujyrymdamasy – bul el Prezidenti Qasym-Jomart Toqaevtyń Qazaqstan halqyna arnaǵan Joldaýyna arqaý bolǵan baǵyttardyń biri sanalady. Biylǵy ákimderdiń halyq aldynda esep berýi - memleket tujyrymdamasynyń múltiksiz oryndalýynyń aiǵaǵy. Qorytyndy esepke deiin barlyq eldimeken turǵyndaryn aralap shyqqanyn jáne turǵyndardy jeke máseleleri boiynsha qabyldaǵanyn jetkizdi.
Shekaraly aýdan ákiminiń jumysymen tanys bolǵan aimaq basshysy ákimderdiń buqaraǵa barynsha jaqyn ekenin naqty ispen kórsetý kerektigin atap ótti.
«Biylǵy jyldyq esep berý jiyndary erekshe úlgide ótip jatyr. Ákimder qordalanǵan máselelerdiń túiinin tarqatyp, el aldynda qorytyndylaýda. Jyldyq esep berýde san, tsifrdan kóri oryndalǵan jumystar jaily ashyq, búkpesiz áńgime aitylýy tiis. Halyqtyń ókpe-nazyn tyńdap qana qoimai, týyndaǵan másele birden sheshilgen jón. Sondyqtan jergilikti bilik ókilderi halyqpen qoian-qoltyq jumys isteýi kerek»,-dedi jiyndy qorytyndylaǵan Ómirzaq Shókeev.
