Arystyń damýy qurylys jumystary aiaqtalǵan soń da qarqyndy jalǵasady. Bul týraly Túrkistan oblysynyń ákimi Ómirzaq Shókeev Arys qalasynda ótken aptalyq apparattyq májiliste atap ótti, dep habarlaidy QazAqparat óńir basshysynyń baspasóz qyzmetine silteme jasap.
Arys qalasyndaǵy ekonomikalyq-áleýmettik damý jumystary jańa qarqynda jalǵasyn tappaq. Otyrysta Arysta atqarylyp jatqan jumystar men jol, káriz júiesi jáne qurylystyń qujattandyrýy jaily sońǵy málimetter talqylandy. Jiynda Nur-Sultan, Aqmola, Aqtóbe, Shymkent, Pavlodar, Batys Qazaqstan oblystarynyń ókilderi qujattardy tolyq rásimdep, ortalyqqa tapsyrý jaǵyn keshiktirip jatqany jaily aityldy. Oblys basshysy bul máseleni jyldamyraq sheshýdi tapsyrdy. Sondai-aq, Aqtóbe sektoryna qaraityn birneshe úidiń qaita saraptaýdan ótkeni belgili boldy. Nátijesinde olar tolyq súrilip, jańadan soǵylady. Qurylysty oblys óz qolyna aldy. Jarylystan 8 myńnan astam turǵyn úidiń 7634-i zaqymdanǵan bolsa, zertteý-zerdeleý jumystary júrgizilgennen keiin turýǵa jaramsyz dep tanylǵan 474 úi qaita basynan salynýda. Qazirgi tańda 330 úidiń qurylysy aiaqtaldy. Tolyq súrilip tastap, qaita kóterilgen 144 úidiń qurylysy da aiaqtalýǵa taiady. Qazir ishki árleý jumystary júrip jatyr. Qaladaǵy infraqurylymdy retteý barysynda Arys qalasynyń káriz júieleri tolyq jóndeýden ótip, avtomattandyryldy. Arys jylytý maýsymyna da tolyq daiyn. Zaqym kelgen Arys kósheleri de jóndeýden ótti. 16 kósheniń aiaqjol salý jumystary aiaqtalyp, jaryqtandyrý boiynsha jumystar júrgizilip jatyr.
Sondai-aq apparat májilisinde oblystaǵy mal jáne ósimdik sharýashylyǵy salalarynyń 9 ailyq jumys qorytyndysy jaily baiandama jasaldy. Ómirzaq Estaiuly ósimdik sharýashylyǵy ónimderiniń importyn jáne mal bordaqylaý alańdaryndaǵy barlyq talaptardyń saqtalýyn qatań baqylaýdy tapsyrdy. Mal aýrýlarynyń aldyn alý jáne emdeý maqsatynda QR AShM Veterinarlyq qadaǵalaý komitetiniń aýmaqtyq inspektsiiasymen birlesip oblystyq veterinarlyq qyzmetin jumyldyrý jáne kúsheitýdi tapsyrdy. Aimaq basshysy azyq-túlik ónimderiniń saqtaýdyń mańyzdylyǵyn da atap ótti.
