Túrkistan oblysynyń ákimi Ómirzaq Shókeev Arys qalasyndaǵy qalpyna keltirý jumystary men qalanyń búgingi tirshiligi týraly aityp berdi, dep habarlaidy "Ult aqparat".
«Arysty qalpyna keltirý týraly aitsaq, az ýaqyt ishinde qanshama jumys atqaryldy. Mundai qiraýdan keiin qaita qalpyna keltirýge jarty, keide bir jyl ýaqyt ketedi. Oqiǵa 24 maýsym kúni boldy, ýaqytynda shuǵyl sharalar qabyldandy. Qalany sektor boiynsha jóndeý týraly sheshim qabyldandy. Biz qurylysshylarǵa qalany 2-3 aidyń ishinde qalpyna keltirýdi tapsyrdyq. Qiraǵan úilerdi qaita turǵyzý ońai jumys emes, degenmen 2 aidyń ishinde úilerdiń 90 paiyzy daiyn boldy. Qazirgi ýaqytta qiraǵan jeke jáne kópqabatty úilerdiń qurylysyna qatysty jumystar júrip jatyr. Jumys baqylaýda jáne 1 qarashaǵa deiin bitýi tiis», - dedi Ó.Shúkeev Ortalyq kommýnikatsiialar qyzmetinde ótken baspasóz máslihatynda.
Onyń sózinshe, qiraǵan úilerdi qalpyna keltirý jumystaryn Arys turǵyndarynyń ózderi aiaqtai alady.
«Turǵyndar «asyqtyrmańyzdar, bizge sapaly bolǵany mańyzdy» dep otyr. Sondyqtan Arysta búgingi kúni problema joq dep oilaimyz. Sýyq túskenshe barlyq turǵyn óz úiine kiretinine senimdimiz», - dedi ol.
Odan bólek, oblys basshysy Arystaǵy jaǵdaidy jeke basynyń qamy úshin paidalanǵysy kelgen jandar týraly aitty.
«Oqys oqiǵany utymdy paidalanǵysy kelgen túrli nietti adamdar boldy. Bul jerde úidiń jaǵdaiyna qatysty baǵany ákim emes, ministr emes, arnaiy institýt mamandary berdi. Iaǵni úidi qiratý kerek pe, álde qaita qalpyna keltirý qajet pe - ony mamandar sheshedi. Degenmen sotqa júgingender de, jańa úi úshin talasqa túskender de, óz úiin ádeii buzǵan adamdar da boldy. Osy sekildi 100-ge jýyq adammen arnaiy jumys júrgizildi. Qazirgi tańda qalada jaǵdai birqalypty. Qala ózgergen jáne eń bastysy barlyq áleýmettik nysandar (mektep, aýrýhana, mádeniet keshenderi) jańalanyp, jumysyn jalǵastyrýda. Osy oraida eń aldymen arystyqtarǵa jáne qalany qalpyna keltirýge úles qosqan barlyq azamattarǵa alǵys aitamyz», - dedi Ó.Shúkeev.
