Qazaqstanda biznesti qoldaý úshin salyqtyq yntalandyrý sharalary qabyldandy. Bul týraly Ortalyq kommýnikatsiialar qyzmetindegi brifingte QR Ulttyq ekonomika vitse-ministri Mádi Taqiev aitty, dep habarlaidy QazAqparat.
«Aǵymdaǵy jaǵdaida Úkimet Memleket basshysynyń tapsyrmasy boiynsha shaǵyn jáne orta biznesti qoldaý úshin jedel sharalar qabyldap jatyr. Jańa bastamalar biznestiń qarjylandyrýǵa qoljetimdiligin arttyrýdy, qosymsha salyqtyq yntalandyrýdy iske asyrýdy, biznesti tekserýlerden shekteýdi kózdeidi», - dedi ol.
Onyń atap ótýinshe, Memleket basshysynyń «Ekonomikany turaqtandyrý jónindegi odan arǵy sharalar týraly» Jarlyǵyna sáikes biznesti qoldaý úshin salyqtyq yntalandyrý sharalary qabyldandy. Olar saýdadan bastap týristik bizneske deiin ekonomikanyń túrli sektorlaryn qamtidy.
«Máselen, iri saýda nysandary, saýda oiyn-saýyq ortalyqtary, kinozaldar, teatrlar, kórmeler men sporttyq nysandar, qoǵamdyq tamaqtaný, qonaqúi men týristik qyzmet salasynda jumys isteitin salyq tóleýshiler jyldyń sońyna deiin salyqtan bosatyldy. Buǵan qosa, Salyq salýdyń jalpy belgilengen tártibimen jumys isteitin jeke kásipkerler de jyldyń sońyna deiin jeke tabys salyǵynan bosatylyp otyr», - dedi Mádi Taqiev.
Sondai-aq vitse-ministrdiń aitýynsha, agroónerkásip keshenin qoldaý maqsatynda iri qara men asyl tuqymdy qusty qosa alǵanda AÓK-tiń biologiialyq aktivterin iporttaý barysynda qosylǵan qun salyǵy salynbaidy. Buǵan qosa, aýyl sharýashylyǵy taýarlaryn óndirýshiler aýyl sharýashylyǵy maqsatyndaǵy jerlerdiń jer salyǵynan da bosatylady.
«Sonymen qatar baǵa ósimin joiý úshin 2020 jyldyń 1 qazanyna deiin áleýmettik mańyzy bar azyq-túlik taýarlaryna qosylǵan qun salyǵynyń mólsherlemesi 12-den 8 paiyzǵa deiin tómendetildi», dedi ol.
