Foto ©️ Tengrinews.kz / Álihan Sariev
Májilistiń jalpy otyrysynda «Qazaqstannyń keibir zańnamalyq aktilerine jol júrisin uiymdastyrý máseleleri boiynsha ózgerister men tolyqtyrýlar engizý týraly» zań qabyldandy, dep habarlady Halyq Uni.
Qujatty depýtat Ekaterina Smyshliaeva tanystardy.
«Kóshede samokattardyń, giroskýterler men monodóńgelekterdiń jáne olardyń basqa da túri paida bolǵanyn kórip otyrmyz. Bizge jańa kólik quraldarynyń júrisin retteý máseleleri boiynsha ótinishter únemi túsip jatady. Ásirese, bul jaǵdai megapolisterge qatysty. Elektr samokattardyń joldarmen jáne trotýarlarmen júrýi jaiaý júrginshiler men júrgizýshilerge qaýip tóndirip jatyr», - dedi ol.
Depýtat zań jobasy osydan 2 jyl buryn ázirlengenin, biraq samokattarǵa qatysty tehnikalyq reglament tek byltyr shildede qabyldanǵanyn aitty.
«Búgin biz elektr samokattardyń júrisin retteý boiynsha alǵashqy túzetýler toptamasyn usyndyq. Jobaǵa sáikes elektr samokattar kólik quraly retinde tanylady, sondai-aq júrý jyldamdyǵy saǵatyna 25 shaqyrymǵa deiingi kólik quraldary elektrsamokat sanatyna jatady. Elektrsamokattar velosiped joldary men jol jieginde shekteýsiz júre alady. Trotýarlarda saǵatyna 6 shaqyrymnan aspaityn jyldamdyqpen júrýge ruqsat etiledi. Bul tásil – kóliktiń jańa túrin paidalanatyndar men jaiaý júrginshiler úshin eń qolaily sheshim», - dedi Ekaterina Smyshliaeva.
Onyń pikirinshe, trotýardaǵy jyldamdyqty shekteý – jaiaý júrginshilerdiń qaýipsizdigin qamtamasyz etedi.
«Elektr samokat joldyń oń jaq shetimen, onyń ishinde avtobýs jolaǵymen bir qatarda júrýine jol beriledi. Alaida bul úshin júrgizýshi 18 jasqa tolýy jáne shlem kiiýi kerek. Sondai-aq onyń ústinde jaryq shaǵylystyratyn kiim men kez kelgen sanattaǵy júrgizýshi kýáligi bolýy qajet», - dedi depýtat.
