- Shyǵys Qazaqstanda qymyz óndirisi tek shalǵai aýdandarda ǵana emes, qala ishinde de qarqyn ala bastady, dep jazady «Habar 24».
Zyrian qalasyndaǵy Kitapbaevtar otbasy bir jyldan beri ata kásippen tabysty ainalysyp keledi. Eńbekqor áýletke memleket tarapynan da jan-jaqty qoldaý kórsetilýde. Endi nesibesi molaiǵan otbasy mal basyn arttyrýdy kózdep otyr.
Murat Kitapbaev zańger ári ekonomist mamandyǵyn igergen. Zyrian qalasynda biraz ýaqyt jumys istegen ol aqyry táýekel etip, ata kásipti qolǵa alypty. Bir jyldan beri jeke sharýashylyǵyn júrgizip, halyqqa taza ári sapaly qymyz usynyp keledi. Búginde kásipker óz isine ábden mashyqtanyp alǵan. Jaiylymy az bolsa da, árbir bie men qulynnyń kúili bolýyna basa mán beredi.
«Keń jerlerde qulyndy bieniń moinyna qosaqtap jaiyp jiberip baryp saýady. Qazir qala ishi bolǵandyqtan jer tapshy, sondyqtan qulyndy jeke alyp qalyp, ál-aýqatyn saqtap otyramyz», - deidi fermer Murat Kitapbaev.
Murat Zyrian qalasynda qymyz óndirýmen ainalyssa, esh utylmaitynyn bildi. Óitkeni shaharda osyǵan deiin eshkim mundai kásipti qolǵa almapty. Sondyqtan sharýasy birden órge basty. Otbasylyq kásip judyryqtai jumyla eńbek etkende ǵana tabys ákeledi. Sol sebepti Murat árbir josparyn anasymen aqyldasa otyryp qabyldaidy. Óitkeni jas kásipkerge bie saýyp, qymyz baptaýdyń jónin kórsetken de anasy. Al oǵan kezinde dámdi qymyz daiyndaýdyń ádisin óziniń ájesi úiretipti.
Sharýa ieleri kúnine 25-30 litr qymyz daiyndaidy. Aitýlarynsha, shipaly sýsynǵa suranys joǵary. Sondyqtan bolashaqta kásipterin keńeitýge nietti.
