Densaýlyq saqtaý ministri Aleksei Tsoi Shyǵys Qazaqstanda jol apatynan qaza tapqan dárigerlerdiń otbasyna kóńil aitty.
Aleksei Tsoi densaýlyq saqtaý ministrligi ujymynyń atynan jáne jeke óz atynan ShQO-da jol apatynan qaza tapqan jedel járdem qyzmetiniń dárigeri men feldsheriniń otbasyna qaiǵyryp kóńil aitty.
Bul týraly ol Instagram-da jazdy.
"Bul tragediia dáriger bolýdyń qanshalyqty qaýipti ekenin kórsetti. Aýa raiynyń qolaisyzdyǵyna, jumystyń aýyrlyǵyna, sharshaǵanyna qaramastan, dárigerler óz kásibin qashan da adal atqarady. Ókinishke qarai, naýqas ómirin qutqarýǵa shyqqan shuǵyl qyzmet brigadasynyń dárigeri men feldsheri – Bolat Qapsametuly Ázilhanov pen Beibit Tóleýǵazyuly Ǵabdýllin kóz jumdy", - dedi Tsoi jelidegi paraqshasynda.
"Qaiǵyly oqiǵa meditsina qyzmetkerleriniń qaýipsizdigi jaily taǵy bir oilanýǵa túrtki bolyp otyr. Qazir Semeidegi aýrýhanada jansaqtaý bóliminde jatqan jedel meditsinalyq járdem kóligi júrgizýshisiniń tezirek saýyǵyp ketýin tileimiz", dep tolyqtyrdy ministr.
Shyǵys Qazaqstandaǵy jol apaty
Qaiǵyly oqiǵa 3 aqpan kúni boldy.
"DAF" markaly júk kóligi Óskemen qalasynan Semeige bet alǵan. Artynda tirkemesi bolǵan. Keshki saǵat 19:25 shamasynda 29 jastaǵy er adam kóktaiǵaq pen burqasyn saldarynan rólge ie bola almai, joldyń qarsy betine shyǵyp ketip, "GAZ-A31R23" markaly jedel járdem kóligimen soqtyǵysty.
Saldarynan 1972 jáne 1979 jylǵy eki dáriger oqiǵa ornynda qaza boldy.
Jedel járdem kóliginiń júrgizýshisi Semei qalasynyń aýrýhanasyna jetkizildi.
Qazir Qylmystyq kodekstiń 345-baby 4-tarmaǵy boiynsha sotqa deiingi tergeý bastaldy. Sot saraptamalary taǵaiyndaldy.
