Shyǵys Qazaqstan oblysy Kókpekti aýdanynda órt sóndirýshiler 40 gektarǵa jaiylǵan tilsiz jaýmen kúresýde, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, Malinogorsk aýyldyq okrýginde shóp órtengen.
«Jalpy aýdany 40 gektarǵa jetken qyzyl jalyn ormanǵa da jetti. Qazirgi ýaqytta órtke oranǵan orman aýmaǵy 4,2 gektardy qurap otyr. Oqiǵa ornyna 6 órt sóndirýshi, jergilikti atqarýshy organnyń 50 qyzmetkeri, 5 ormanshy jáne 3 tehnika jumyldyrylǵan», - dep habarlady vedomstvo ókilderi.
Sondai-aq qosymsha kúsh retinde Asýbulaq kentinen 5, Kókpekti aýylynan 4 adam kele jatyr. Óskemen qalasynan 20 qutqarýshy jolǵa shyǵýǵa daiyndalýda.
