Shyǵys Qazaqstan oblysy Ulan aýdanynda jylqy urlap, jeńil kólik salonyna tiridei salyp alǵan er adam ustaldy, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, 31 jastaǵy er adam erkin jaiylymnan mal urlaýmen ainalysqan. Ol maldy tiridei kólik salonynyń artqy oryndyǵyna salyp, alyp ketken. Politsiia qyzmetkerleri Ulan aýdanynyń turǵynyn qyrkúiek aiynyń basynda kezekti urlyq ústinde ustady.
«Kúdiktiniń kóligin toqtatqan tártip saqshylary ishte jatqan tiri jylqyny kórdi. Er adam birden politsiia bólimine jetkizilgen. Birshama ýaqyttan keiin jylqynyń iesi tabyldy. Ol malynyń joǵalǵandyǵy týraly múlde bilmegen», - dedi oblystyq PD bastyǵynyń orynbasary Talǵat Shaiahmetov.
Qazirgi ýaqytta QR QK-niń 188-baby (mal urlyǵy) boiynsha tergeý amaldary júrgizilýde. Kúdiktiniń osyǵan deiin birneshe jylqy men buzaý urlaǵandyǵy anyqtalyp otyr.
