Shyǵys Qazaqstan oblysynda 1974 jylǵy KSRO pasportymen turyp jatqan 90-nan astam adam anyqtaldy, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, tártip saqshylary 1974 jylǵy KSRO pasportyn ýaqytyly aýystyrmaǵan adamdardyń quqyqtyq mártebesin retteý boiynsha jumys júrgizýde.
Jyl basynan beri eski qyzyl pasportpen júrgen 90-nan astam azamat anyqtaldy. Olardyń biri 1983 jyly Resei Federatsiiasynan kóship kelgen 54 jastaǵy Shemonaiha aýdanynyń turǵyny. Ol 16 jasqa tolǵannan keiin 1974 jylǵy KSRO pasportyn alǵan.
«Shemonaiha aýdany politsiia bólimi kóshi-qon qyzmeti bólimshesiniń qyzmetkerleri Adam quqyqtary jáne zańdylyqty saqtaý jónindegi Halyqaralyq biýronyń Shyǵys Qazaqstan oblystyq filialynyń zańgerimen birlesip, Óskemen qalasyndaǵy Resei Federatsiiasynyń Bas konsýldyǵy arqyly shet memleket azamattyǵynyń joqtyǵy týraly qajetti aqparatty alýǵa kómek kórsetti. Búgingi tańda er adam kópten kútken qujatty aldy. Endi ol barlyq memlekettik qyzmetterdi paidalana alady», - delingen aqparatta.
Osy rette, politseiler qandai da bir sebeptermen jeke basyn kýálandyratyn qujattary joq azamattarǵa turǵylyqty jeri boiynsha kóshi-qon qyzmetine habarlasýǵa shaqyrdy.
