ShQO ákimi Danial Ahmetov Kókpekti aýdanyndaǵy kópbalaly otbasylarǵa arnalǵan úilerdiń sapasyn tekserdi, dep habarlaidy "Ult aqparat".
Aimaq basshysy Danial Ahmetov Kókpekti aýdanyna jasaǵan jumys sapary barysynda «Aýyl el besigi» baǵdarlamasy aiasynda boi kótergen jańa sport keshenine bas suqty. Bul ortalyqta kez kelgen sport túrimen ainalysý úshin barlyq jaǵdai jasalǵan (fýtbol, basketbol jáne voleibol alańdary, júgirý joldary, jekpe-jek zaldary). Kiim aýystyratyn yńǵaily bólmeler jabdyqtalǵan. Sondai-aq úlken avtoturaq pen balalar oiyn alańy da bar.
«Bul joba turǵyndar arasynda úlken qyzyǵýshylyq týdyrdy. Sondyqtan ony Shyǵys Qazaqstannyń burynǵy 13 aýdan ortalyǵynda júzege asyramyz», - dedi oblys ákimi.
Sapar barysynda ol kópbalaly jáne az qamtylǵan otbasylarǵa satyp alý úshin jeke investorlar esebinen salynǵan úilerdiń jaǵdaiymen tanysty. Bespáterli úiden baspana alǵandardyń biri – tórt balanyń anasy Mádina Qojahmetova. Óńir basshysy kópbalaly otbasyn kele jatqan Naýryz merekesimen quttyqtap, búldirshinderge syilyqtar tabys etti.
Sonymen qatar Danial Ahmetov 101 oqýshy bilim alatyn Bastaýshy jáne 320 bala oqityn Samar aýyldarynda ornalasqan eki mektepte boldy.
«Bastaýshy aýylyndaǵy Abai atyndaǵy orta mektepte oblystyq biýdjet esebinen jasalǵan kúrdeli jóndeý jumystarynyń sapasy jaqsy. Samar №1 orta mektebinde kompiýterler sany jetkilikti. Búginde Shyǵys Qazaqstannyń bilim shańyraqtary elimizde kompiýterlik tehnikamen eń jaqsy jabdyqtalǵan oblys. Biyl taǵy baǵdarlamalaýdyń ozyq túrlerin oqytý boiynsha jańa baǵdarlama iske qosylady», - dedi aimaq basshysy.
